uMthunywa
Gladmore Ncube
INHLANGANISO yeZimbabwe Farmers Union (ZFU) isikhuthaze intsha ukuba iqalise ukuphatheka kumisebenzi yezokulima ngoba kulemali enhle nxa kuthe kwaqhutshwa ngendlela efaneleyo.
Abenhlanganiso le bathe ukulima kuyaphathisa njalo kuyathuthukisa impilo zabantu ngoba kuyikuzisebenza okulenzuzo emangalisayo.
UNkosazana Bridget Masikati onguRegional Project Co-ordinator weZimbabwe Farmers Union ukhuthaze intsha ukuthi akumelanga kube lomuntu omutsha okhala ngokuthi kalakho okokwenza okungamlethela imali ngoba ukulima kungenye yezinhlangothi abangangena kizo.
“Njengoba izinto zimi manzonzo elizweni akumelanga kube lomuntu omutsha okhala ngokuthi kala msebenzi wokuziphilisa ngoba ukulima ngenye indlela abatsha abangathola ngayo imali. “Abatsha kumele basukumele phezulu kulokhu ngoba inhlanganiso yethu iyaphathisa kakhulu abalimi abatsha ukuthi babe lempumela enhle ekulimeni kwabo izilimo kanye lasekufuyeni.
“IZFU njengenhlangansio ebona ngezokulima ilakho njalo ukunika abatsha imfundiso abayidingayo ukuze benze kuhle nxa sebethe bangena ekulimeni. Abalimi siyabuya sibaphe lamacebo okudinga indlela ezingabathengisela masinya izilimo zabo,” kutsho uNkszn Masikati.
Uqhubekele phambili wathi kumqoka ukuthi abalimi basebenze ngamaqembu, isizatho siyikuthi nxa bengamaqembu bayathola umkambo ophezulu onjengezitolo ezinkulu ezithenga izilimo ngobunengi.
Ugcizelele njalo ngokusebenza bengaqembu ethi nxa bethenga inhlanyelo kumbe usaba olunengi lulentengo ephansi kwekalo ozithengela emi yedwa.
“Amaqembu mahle kakhulu ngoba ayanika abalimi ithuba lokuboleka imali zokuthi bathenge konke okungabe kufunakala ukuze babe lesivuno esihle. IZFU isebenzisana lamabhanga akhangele amaqembu abalimi, ibaboleka imali sebeyibisa nxa sebethe bathengisa izilimo zabo,” kutsho uNkszn Masikati.
Uqhubekele phambili wathi intsha kayingene kwezokulima njalo isibenzisane leZFU ngoba abatsha yibo abalemicabango ekhaliphileyo njalo bayakwazi ukuthi baxhumane lezinye inhlanganiso ezikhangela ngezokulima ebulenjini.
“Intsha ingakhuthala ingene kwezokulima isebenzise imicabango lamacebo yayo alenkalipho kungaba lempumela enhle kwezokulima ezathuthukisa impilo kazulu,” kuphetha uNkszn Masikati.
