uMthunywa
Cornelius Luphahla
INHLANGANISO yabomama iLupane Women’s Centre ikhuthaza ontanga ukuthi bangene kuma Vocational Training Centers nxa bengaphumelelanga kuhle ezifundweni, ngoba alakho ukubanika ulwazi olungabathuthukisa.
Lokhu kuvezwe nguMqondisi walinhlanganiso uNkosikazi Hildegard Mufukari ngemva kokunanzelela ukuba inengi labontanga lihlezi emakhaya kalenzi lutho okudala ukuthi amantombazane ende esasemancane.
Ekhuluma lentatheli uMqondisi walinhlanganiso uNkkz Mufukari uveze ukuthi ukuhlala kwabantwana ekhaya bengafundi kuyingozi enkulu.
“Sinanzelele ukuthi inengi labantwana kule indawo kalifundi okuyikho okudala ukuthi abanye babo babeyizigangi batshontshele abantu ngenhloso yokuthola imali. Amantombazana akhona uwathola emabhawa enatha utshwala amanye ethengisa imizimba yawo okuyikho okubabulalela ikusasa labo. Kwesinye isikhathi uthola umntwana omncane esendile ngenxa yokuswela okokwenza, okuyingozi ebantwaneni,” kuchaza uNkkz Mufukari.
UNkkz Mufukari ubuye njalo wachaza ukuthi ontanga kufanele baqakathekise ukufundela imisebenzi yezandla ukuze bazithuthukise.
“Njengoba imisebenzi ingatholakali kuhle lapha kuqakathekile ukuthi ontanga baphatheke emisebenzini yezandla ukuze bazithuthukise. Nxa indawo yokufunda imisebenzi le isiphelile njengoba zizilutshwana lapha eLupane kungcono bancedise endaweni ezifana leLupane Business Association lapho okwenziwa khona imisebenzi yezandla.
“Noma nje ekuphathekeni endaweni ezifana lalezi kungasoze kubaphe imali kodwa kuzabapha ulwazi okuyilo abazalusebenzisa sebezenzela okwabo. Ngezinye indlela lokhu kuyabe kufana xathu le Vocational Training Center ngakho kuyafundisa imisebenzi yezandla etshiyeneyo.
“Ngalokhu-ke intsha kayingaqakathekisi ukuya eGoli, kuqakathekile ukuthi isebenzele khonapha izithuthukise ngendlela ezehlukeneyo. Noma nje kuleYunivesithi kulindawo abanye abantwana bayaphumelela kodwa behluleke ukuyaphambili ngenxa yokuswela imali ngakho kuqakathekile ukuthi bafundele imisebenzi yezandla,” kutsho uNkkz Mufukari.
UNkkz Mufukari ubuye waveza njalo ukuthi njengezakhamizi zeLupane bafisa ukuthi uHulumende angenele abakhele izikolo zemisebenzi yezandla njengoba nje zisilela kule indawo okudala ukuthi intsha ingathuthuki.
