uMthunywa
YiNtatheli kaMthunywa
INTSHA yeHwange isizathola ukuphucuka kancane kwezemidlalo kulandela isinqumo sokuletha imincintiswano yemidlalo ye-basketball esabelweni seMatabeleland North.
Unobhala weBasketball Union of Zimbabwe esabelweni seMatabeleland North uPenrick Ndhlovu ubike ukuba bazimisele ukuthuthukisa umdlalo lo kuzo zonke izigaba zeMatabeleland ngoba ukumemetheka kwawo kulesisabelo kungumlandu wabo.
UNdhlovu ubike ukuba minengi imncintiswano yenkezo ezadlalelwa edolobheni leHwange, bekhangelele ukuthi ezinye izigaba zeMat North zizaphatheka zenelisa ukuthi zijulisise ubungcitshi babadlali kulumdlalo.
“Kade saqalisa ukukhuluma ngokuthi kumele umdlalo wethu ufike kundawo ezikhatshana lamadolobho. Lapha esabelelweni seMat North amaqembu adlala ibasketball okuzwayo atholakala eHwange. Ngokunjalo, sesinxuse amathimu aseLupane laseVictoria Falls ukuthi abeyingxenye yokukhuphukisa umdlalo kwelakithi.
“Silandela lokhu okwenzakala kumadolobho abalisa iPlumtree leGwanda lapho okusekuvuselelwe amathimu amanengi,” kutsho uNdhlovu.
Ekuqaleni kwalumnyaka inhlanganiso yeBUZ yabika ukuthi nxa ingathola usekelo kumathimu angaphandle kwamadolobho amakhulu, izazama ukudinga amabhola lamambule.Inhlanganiso le iphezulu komkhankaso wokudinga imali yokwakha inkundla ezigabeni ezikhatshana.
Imbiko efinyelele uMthunywa ithi nxa ukwakhiwa kwalezinkundla kungaphela kukhangelelwe ukuthi kube lamaligi azaqhutshwa ngasikhathi sinye lawakoBulawayo.
UNdhlovu ugcizelele ngokuthi inkundla ezizasetshenziswa yilezo ezisezikolo lasemakolitshini.
“Njengokubika kwenhlanganiso yethu yeBasketball Union of Zimbabwe, amabhola lamambule yikho okukhathaza amaqembu. Inkundla azihluphi ngoba zikhona ezikolo. Kubalulekile ukuthi nxa sinxusa amaqembu kumincintiswano yethu athole kulempahla efana lale.”
Umdlalo we-basketball ukhona kulesisigaba kodwa udubo yikuthi akulankundla yemidlalo le ngaphandle kwalezo ezisezikolo.
“Silokuthaba ukubika ukuthi ngaphansi kohlelo lwethu lokukhulisa i-basketball, sicabange ukuvuselela umdlalo we lapha eMat North.
“Sikhangelele ukuvula inkundla zemidlalo ye-basketball lonyaka. Okuhlabusayo yikuthi intsha yakulindawo isizakuba lendawo yokuchitha isizungu ngalumdlalo. Umdlalo wethu awulabadlali abanengi ngenxa yokuthi akulankudla lempahla ebalisa amabhola, amambule kanye lezigqoko.”
