uMthunywa
Nkosilathi Sibanda
Inkundla zemidlalo ezibalisela iLuveve, iAscot eGweru, iSakubva eMutare leGibbo eChiredzi kumele zilungiswe.
Kuliviki kuvele ukuba inkundla yeLuveve kungenzeka ukuthi ingasetshenziswa kumidlalo yeChampions League, nanko phela inhlanganiso yeConfederation of African Football iyakhonona ngesimo salinkundla okumele isetshenziswe yiChicken Inn kulumkhankaso.
Ngesizini edluleyo, manengi amathimu akhonona ngenkundla ezilamagodi, ezingacentwayo lezambuzi ezinukayo.
UMthunywa uxoxisane loLewis Mabhande isikhulu seZifa esibona ngenkundla othe ukukhalaza ngesimo senkundla lokhu akusinto entsha kodwa kubalulekile ukuthi kulungiswe lapho okulensolo khona.
UMabhande ubike ukuba kunengi okwenza inkundla zakuleli zingakhethwa kumidlalo yaphezulu kubangelwa yikwehluleka ukuzigcina kuhle.
UMabhande ngomunye wabahloli benkundla abacelwe ukuthi bakhangelisise isimo seLuveve andubana isetshenziswe kumidlalo yeCaf Champions League.
“Kambe kuyoze kube nini sihlala sikhala ngokuthi inkundla kazilungisiswe. Kukholisa amathimu asebenzisa inkundla ezakhiwe kuhle. Zikhona inkundla othi nxa uzibona usole isimo sazo. Isimanga yikuthi ngenxa yokuswelakala kwenkundla, imidlalo yeligi ephakemeyo icina isidlalelwa lapho okungamelanga idlalwe khona.
“Isimanga uzafica leziphathamandla zenguqu zibukele imidlalo kunkundla esikhuluma ngazo. Kungathiwa kayidlalwe yikho lokho,” kutsho uMabhande.
Ithimu lethimu ilelungelo eligcweleyo lokudlalela ekhaya layo, kodwa kuthiwani nxa lelokhaya lingathokozisi izethekeli.
Umaqhuzu wePSL uKennedy Ndebele uthe kuyisifiso sabo ukuthi inkundla zenguqu zakhiwe ngendlela ezasuthisa wonke umuntu.
“Ngeke uthi ulomuzi omuhle nxa izethekeli zakho zihlala zikhala ngokungaphathwa kuhle. Zinengi inkundla ezingeke zaqanjwa la, okwaziwayo ukuthi azilungelanga ukudlalelwa. Ngenxa yokusilela kwenkundla, sicina sidlalela kulezo ezikhona,” nguNdebele lo.
Abacubunguli benguqu yakuleli babike ukuthi isimo senkundla lesi sidala ukuthi iZimbabwe incitshwe ithuba lokuqhuba imidlalo yaphezulu.
“Akumangalisi ukuthi sihlala zincitshwa ithuba lokuqhuba imincintiswano yenguqu. Kanti yiliphi ilizwe elingavuma ukudlalela emagodini eSakubva?
“Okuphambanisa iPSL leZifa yibucwazicwazi benkundla yeNational Sports bekhohlwe ukuthi yiyo yodwa inkundla ecacayo. INational Sports Stadium izathola yonke imidlalo yaphezulu ngoba akuladolobho elilenkundla efana lale,” kutsho uCharles Siwela, ongusaziwayo kwezokucubungula inguqu kumhlubulo ongezansi yelizwe.
Uqhubeke wathi: “Singaqeda isikhathi sisola iZifa lePSL kodwa umlandu ukubanikazi benkundla lezi. Lesi yiso isikhathi sokuthi amathimu akhuthazwe ukwakha inkundla, endaweni yokuthi aboleke inkundla ezakhiwa ngendlela engayisiyo.
“Abanikazi benkundla ezinengi ngamakhansili. Kungumlandu wamakhansili la njalo ukuthi bakhe inkundla ezilungele inguqu.”
UMabhande wengeze wathi kuqakathekile ukuba lezakhiwo ezilandela imthetho yeFifa ngenxa yokuthi ithalenta lenguqu libonakala lula ngoba inkundla zokudlalela ziyabe zinengi.
“Nxa singaba lenkundla ezisuthisa isinqumo eziphawulwe yiFifa, kuzabonakala ukuthi amabhizimusi ayanda, lezethekeli ziyasuthiseka. Lokhu kuzakweza kube lesisindo selizwe kwezemidlalo.”
Kumasizini amathathu adluleyo, kwake kwahlupha inkundla yeDulibadzimu. Kwazohlupha njalo iBaghdad eKwekwe. Amaqembu akhala aze ahawula iPSL isehluleka ukubopha umthetho.
