uMthunywa
Blessing Moyo
INKOMO zochago zinkomo okumele ziphathwe ngobunono obuphezulu. Umlimi kumele abone ukuthi amanzi awanika inkomo ahlanzekile njalo abone ukuthi zidla zisuthe.
Ekhuluma loMthunywa uMnumzana Cosmas Muzunde oyingcitshi kwezokufuywa kwenkomo zochago uthe kubalulekile ukuthi inkomo zithole ukudla okwaneleyo.
“Abalimi sibakhuthaza ukuthi basike utshani babe sebethatha amahlanga omumbu kumbe insalela zamazambane ngesikhathi samahlanga bakuhlanganise le-protein block kube yikho ukudla abakunika inkomo zabo khathesi njengoba izulu lingakani.
“Isikhathi lesi sandise ukuba ngesendlala okucina kubangela ukuthi inkomo ezinengi zicube zicine zingasehlisi uchago olweneleyo kungakho umlimi kumele abone ukuthi uhlala elamahlanga okudla kwenkomo izikhathi zonke.
Uqhubeke esithi ukusika utshani lokugcina amahlanga abemanengi kuyanceda ngoba kwenza indleko zokuthenga i-protein zibe nganeno.
“Amahlanga yiwo kanye adingwa zinkomo kungakho nxa umlimi angazigcinela kuyamsiza kakhulu kulokuthi athenge utshani abuye athenge le-protein block futhi.
Uthe abafuyi abanengi balomkhuba njalo wokunakekela inkomo abazisengayo zodwa bakhohlwe amathole kukanti lawo kumele bawanakekele ngoba kusasa bazabe sebesenga wona.
“Amathole kumele aphathwe kuhle njalo adibhiswe ukuze avikeleke emikhuhlaneni. Akumelanga ahlaliswe esibayeni esilamanzi ngoba amasondo elakho ukudabuka.
“Lapho ithole lizalwa umlimi kumele abekhona ukuze izinja loba amakhanka kungalidli. Futhi kumele ahlatshwe ukuze avikelwe emikhuhlaneni,” kutsho uMnu Muzunde.
Uphethe ngokuthi inkomo ezisengwayo akumelanga zihambe umango omude zidinga ukudla ngoba lokhu kuziqeda amandla okwenza zicine zingasehlisi kakhulu.
