uMthunywa
Cornelius Luphahla
ZIKHUZA imihlola izakhamizi zesigabeni seMasuswini eLupane ngemva kokuba enye indoda ifungele esinye isakhamuzi ijoyi kulandela ukuxabana kubangwa inkomo ezidle amabele.
Kubikwa uMnumzana Richard Tshuma watshela uMnumzama Editor Mpala ukuba uzabona lakanye watshaywa yizinto ngoMvulo kuyonale iviki ngemva kokuba inkomo zakhe zidle amabele kaTshuma.
Izakhamizi zakule indawo zibikele uMthunywa ukuthi ngemva kokuxabana kukaMpala loTshuma, uMpala watshaywa ngondofa okwenza zicabangele ukuthi uTshuma angabe elesandla kulokhu.
UMthunywa ukhulumisane loMnumzana Dalumuzi Nkomo owayehamba loMpala ngalelolanga wathi uTshuma wathetha kakhulu ngokudliwa kwamabele akhe wathi uMpala uzakubona okukhulu.
“Mina ngangikhona mhla uTshuma ethethisa uMpala bebanga inkomo ezazidle amabele. UMpala wathi ngimphelekezele ukuyaxolisa koTshuma sathi sifika uTshuma wadla ubhedu ethi yena kalaso isikhathi sokuxolelana loMpala.
“Wabuya njalo wabheja ethi yena ngeke wadlalelwa ngumuntu ngakho uMpala uzakubona okukhulu ilanga lingakatshoni. Okwangimangalisayo yikuthi lakanye lathi lingakatshoni ngesikhathi sesibuyela emzini wakhe ngamuzwa ethi ubona abafana bakaTshuma wahle wawela phansi wangasakhulumi,” kulandisa uMnu Nkomo.
Ekhuluma loMthunywa umkaMpala, uNkosikazi Silindeni Mpala uthe yena wezwa sebizwa ngabantu wathola umkakhe setshaywe yizinto.
“Mina ngangizihlalele ekhaya emini yantambama ngabona umakhelwane esezongibiza ethi umkami kasezwa kuhle.
Ngamangala kakhulu ngathi ngifika kuye ngamthola engasakhulumi samthwala samusa kubaphurofethi.
“Ekufikeni kwethu abaphurofethi bahle bathi utshayiswe ngumakhelwane obexabana laye bebanga izifuyo. Lokhu kwenza sangathandabuzi ukuthi nguTshuma ngoba abaphurofethi laba babengazi lokuthi umkami wayeke waxabana loTshuma. Abaphurofethi laba yibo abamsizayo noma nje lokhu engakasilisisi,” kuveza uNkkz Mpala.
Ebuzwa ngale indaba uMnu Tshuma uthe yena uzwa ubuhlungu ngokudliwa kwamabele akhe zinkomo zikaMpala ngakho kalaso isikhathi sokukhuluma ngokutshaywa kukaMpala yizinto.
“Mina ngizwa ubuhlungu kakhulu ngokudliwa kwamabele ami zinkomo zikaMpala ngakho kangilaso isikhathi sokukhuluma ngokutshaywa kwakhe yizinto ngoba kangikungeni lokho,” kutsho uMnu Tshuma.
Usobhuku wakule indawo uMnumzana Elias Ncube ebuzwa ngale indaba uvumile ukuthi uyayazi wathi kalankani ngayo.
“Kuliqiniso sibili ukuthi uMpala uxabane loTshuma bebanga izifuyo ebezidle amabele uMpala wasetshaywa ngondofa. Ukuthi ondofa laba ngabakabani ngeke ngikuchaze ngoba ngangingekho njalo into zokuzwa ziyahlupha kodwa ngazi ukuthi ngabesinye isakhamuzi,” kuphetha uMnu Ncube.
