uMthunywa
Gladmore Ncube
ZIKHALA ezimathonsi izakhamizi zendaweni yeKana, eFilabusi kulandela ukuzwa ngesalukazi esesiqede inkomo zazo simunyisa osinti baso uchago.
UMthunywa uvakatshele eFilabusi ngeviki edluleyo wezwa ukuthi uNkosazana Nadia Mlalazi kucatshangelwa ukuthi useqede inkomo zabomakhelwane bakhe emunyisa usinti wakhe ocina sezimunya legazi okucina kubangela ukuthi zife.
Kubikwa sekulezakhamizi ezine esezifelwe zinkomo zazo ngenxa kasinti lo ozimunyayo.
Intatheli ikhulumisane loNkosazana Nobuhle Msipha othe kuliqiniso ukuthi izakhamizi zakule indawo zikhala ngenkomo zazo ezimunywa uchago kanye legazi ngusinti.
“Ukwanda kwenkomo ayisikho kuthanda kwakho kodwa nguNkulunkulu oyabe ekhethile ukuthi zikuvume.
Ngiyazibuza ukuthi umuntu uyabe secabangani nxa sekhetha ukuthi afunze imikhoba yakhe ngochago okumele lukhulise amathole akho.
“Inkomo zabantu phose abane sezife ngendlela engaqedakaliyo abanye baze babona kungcono ukuthi bayedingisisa ukuthi kuyini okubulala izifuyo zabo babikelwa ukuthi uNkszn Mlalazi nguye othumela usinti wakhe ukuthi ayemunya inkomo ayiqede uchago acine semunya legazi ife itshiye lethole singakafiki isikhathi sokuthi liphusiswe,” kuchaza uNkszn Msipha.
Iphephandaba likazulu likhulumisane njalo loMnumzana Josphat Moyo othe yena udaba lukasinti omunya inkomo uchago kanye legazi uyalwazi.
“Umhawu yisenzo esibi kakhulu, kambe umuntu sengaze abulale inkomo zitshiye amathole esesemancinyane. Mina ngokwami ngafelwa lithokazi elalingizalela kakhulu ngezwa ubuhlungu.
“Ngangizitshela ukuthi lizifele ithokazi lami kodwa ngathi ngisizwa ihungahunga leli lokuthi uNkszn Mlalazi nguye obanjwe ngabaphurofethi ukuthi ubulala inkomo zethu ngezwa ubuhlungu kakhulu ukuthi kungani esenzenje, ayisithi esathi umkakhe amtshiye engela inkomo,” kuchaza uMnu Moyo.
Intatheli ikhulumisane loNkszn Mlalazi othe yena uzwa ubuhlungu ngalokhu ngoba yena lokhe wazalwayo kakaze awubambe umuthi esithi uyathakatha umuntu.
“Mina angiloyi, abantu bayangisukela, angikaze ngibambe umuthi ngiloya umuntu. Usinti lowo abathi ngilaye ababuye bezomthatha sibone ukuthi ngowami ngempela. Isimanga yikuthi osinti bagcwele iganga lonke leli sekuthiwa mina ngigcine omunye endlini. Kambe sibili ngubani osengagcina usinti endlini yena engoweganga?” kuphetha uNkszn Mlalazi.
