uMthunywa
YiNtatheli kaMthunywa
ABADLALI benguqu Esigodini esabelweni seMatabeleland South abazitshela ukuthi balethalenta elimangalisayo sebenikezwe ithuba lokuzibonakalisa kulimpelaviki kunkezo kaCanaan Nkomo umdlali wodumo kuChicken Inn.
Lo ngumnyaka wesithathu kuqhutshwa lumqhudelwano odibanisa amaqembu ayisitshiyagalombili aphuma kuligi yeWafawafa kulumango.
UNkomo, ongomunye wabadlali abaphakemeyo kumbali yenguqu yakuleli, ubikele uMthunywa kuliviki ukuthi sekulindwe ukuyavuthisa inkundla zeHabane, Esigodini ngoMgqibelo.
Umdlali lo wenza konke lokhu ethola usekelo kusibalukhulu weChicken Inn uTavengwa Hara labanye osomabhizimusi.
“Sesifikile isikhathi seminyaka yonke senkezo ebizwa ngokuthi yiCanaan Nkomo Invitational Tournament. Imidlalo le iqhutshwa ngaphansi kwebizo lami Esigodini oyikulapho engidabuka khona njalo yikho engaqala khona ukudlala ibhola. Ngibonga uTavengwa Hara isiphathamandla seqembu lami iChicken Inn, usomabhizimusi wakithi uLeonard ngokungincedisa.
“Ngikhangelele ukuthi kuncintisane amaqembu ayisitshiyagalombili akuligi yeWafawafa kulindawo yakithi,” kutsho uNkomo.
Uthe umbono wokuthi aqhube imidlalo yebizo lakhe eSigodini yeza ngemva kokubona ukuthi ayisuye yedwa umdlali olethalenta odabuka kulindawo.
“Ngananzelela ukuthi banengi abafana abasakhulayo abatshisekela ukudlalela amaqembu aphezulu, ikakhulu lawo akuPremier League. Lami ngisakhula ngangilesifiso esifanayo. Yikho kuqakathekile ukuthi sibuyele muva lapho esiphuma khona siphakamise abafana bethu ngokubenzela imidlalo enjengale.”
UNkomo uthe uzanxusa izikhulu ezivela kwamanye amathimu kuleli ukuze zizibonele mathupha ithalenta eligcwele eSigodini.
“Umbiko wami kubadlali abakumaqembu anxusiweyo yikuthi balungiselele ukuthi badlale ngokuzimisela.
“Leli lithuba lokuthi abadlali abasacathula kunguqu baziveze. Kunxuswe wonke umuntu owaziwayo kunguqu okubalisa omaneja bamaqembu amakhulu. Umdlali ozimiseleyo ukuthi aphumelele uzabonakala,” nguNkomo lo.
UNkomo uthe njengoba imidlalo yakhe ihlose ukuphakamisa abadlali lokubaveza emphakathini, imvuzo yalonyaka yimpahla yokudlalisa kanye le$200 ezathathwa liqembu elizanqoba.
“Ithimu ezanqoba izaphiwa i$200 le-kit. Lokhu yikho esihlala sikwenza kusukela ngo2014. Inhloso yokuthi siphe abadlali abasemaphandleni ithuba.”
Kumidlalo kaNkomo le sekuphume abadlali asebetshibilikela iHighlanders uInnocent Chifamba loTalent Moyo.
NgoMgqibelo abalandeli benguqu eSigodini bazajabula ukutshona ilanga belabosaziwayo benguqu ababalisi abadlali uGuide Goddard, uDevine Lunga, uThabani Goredema, uToto Banda loMkhokheli Dube.
