uMthunywa
Pathisa Nyathi
NGEVIKI elidluleyo ngethekelele eNyathi lapho obekulomkhosi owawenzelwe uSenethanduna uMtshane Khumalo.
OkaTatazela kaSomvubu kaMtshane ungumsekeli kaSenethanduna uFortune Charumbira onguMongameli weKhansili yeziNduna. Induna uKhumalo useleminyaka engamatshumi amane eyinduna, kanti futhi useleminyaka elitshumi lanhlanu elilunga leSenethi. Ngakho abantwabakhe bebemenzele idili elikhulu elokubonga iminyaka eminengi kangaka ekhokhela abantu beNyathi, eSiganda lakoNkosikazi. Zikhona ezinye izindawo ezintsha ezisanda kuhlalwa ngabaNsundu esezingaphansi kwesigaba sakhe.
Lalitshisa likhupha inhlanzi emanzini, likhupha lomkhovu etsheni. Amaxhegu amayezi aphakama sathemba ukuthi kuza isiwodlo. Esakutholayo kwabalilanga elosa impabanga zamadoda. Sawanatha amanzi ukuze sithambise imilomo. UNdumiso Gumede nguye owayephethe uhlelo. Kwakungabizwa ozwayo abantu beyinyelane abasuka ngezindawo ngezindawo zonke eziphethwe ngubaba uKhumalo.
Ayekhona amajaha aphuma eNkantolo, ejele phela ayehlabela okuhlaba umxhwele. Babeze labakhokheli babo ngenkalakatha yemota. Lalikhona lalo iqembu leThandanani elacula okuginyisa amathe lihlabela futhi ligida iwosana, umdadada lembube begagadlele indabula. Lalikhona ikhehla elinguMaqeda elakoNgenya elahatsha okaKhumalo ngezibongo zakwabo. Hawu suka bo wagiya wazemba wahlabekisa. Kwezokuvunula imvunulo yezolo izwe lisakhile umfokaSihlahla uNguye Nyathi wahlabekisa. Wayephelele lowo wasikhumbuza insuku zezolo.
Izethekeli zazinengi. Kweza yena uMongameli weKhansili yezinduna uCharumbira ekhatshwe ngezinye izinduna ezigoqela lezi: uNyangazonke owakoNdiweni, uGampu okamaqekeni Sithole, uMathuphula Khumalo engokaSibhamubhamu, Umakhikwa engokaMlonyeni, uNgungumbane okaMhabahaba engowakoMhkwananzi uMpandeyamadoda kunye loSiansali oweBinga. LoDarekitha wezinduna uMkwaira wayezile. Ngokuya kwesikhathi kwazafika ezinye izethekeli zigoqela induna yaboSikomitshi eMatabeleland North uNkosazana Latiso Dhlamini, loSibongile engowakoDhlamini laye wayekhona esuka kuNhlanganiso yeKhansili ekhangele ngezoKhetho. USenetha uMaBhebhe wayephakathi kwawo umkhamandolo. Ilunga lePhalamende eleBubi onguNgqongqotshe emahofisini kaMsekeli kaMongameli u-Emmerson Mnangagwa.
Abathokozisa abantu babelokhu becula behaya lwaze lwaqala uhlelo. UMsekeli-mongameli nguye owayeyisethekeli esiqavileyo. Kodwa ngokubambeka ekwezinye izindawo wacina ezefika ngemva kokuba abantu sebethole okuya ngethunjini. Lwaqala uhlelo ngenkonzo emfitshane ikhokhelwe nguReverend S Mhlanga oweNyathi, ibandla kuyi-United Congregational Church of Southern Africa (UCCSA) ekadeni eyayibizwa London Missionary Society (LMS).
Emveni sethulelwa imuli kaKhumalo anduba okaMaqeda asethulele inkondlo yakhe.
Ngenxa yokuthi isikhathi sasesidliwe ngumangoye izikhulumi zaphiwa imizuzu emilutshwana. UMkwaira wethula eyakhe wancoma okaMtshane embuka njengomkhokheli okhaliphileyo. UMaBhebhe laye wethula eyakhe kunye loSibanda. Ekucineni kwazakhuluma yena uSenethanduna Charumbira. Eyakhe yabayinkulumo eyimvezabuhlobo obuphakathi kwakhe lenduna uMtshane. Wamncona okaKhumalo watsho ukuthi bona beze ukuzaveza lokugcwalisa ukuthi ngempela uKhumalo yinduna ebusa ngokuhlakanipha futhi esicebise izinduna ezintsha izindlela zokuphatha abantu.
Banengi abantu abathi bangaphatha abantu loba babelezikhundla eziphakeme bakhukhumale sengathi umuntu lunwabu. Bayakuthanda ukuzibonakalisa lezinkulumo zabo ngezigegela khona ekutheni lonke bonani ukuthi bona baphakeme. Akanjalo umfokaKhumalo, ngumkhokheli ozothile ongaziqakiyo opholile futhi obusa ngesizotha langesineke. Hawu, ngabe abantu bonke babusa njengaye ngabe ukubuswa akusixhophi, akusithunuki. Pho akunjalo abanye bathi ukubusa yikuhlala abanye amadundulu, ukubusa yikudlisa abanye imbuya ngothi. Hawu Batayi, kasikhokheleni abantu singaze sababusa nxa lokhu singakuphiwanga. Phela le yinzalwalaye, akuthengwa esitolo ngoba singekho esithengisa ukukhokhela bantu.
Kuthe sesidlile wazathutsha uMsekelamongameli eza ekhatshwe nguNgqongqotshe u-Obert Mpofu lomkakhe.
Esethulwe ngokaMpofu watheleka enkundleni okaMphoko kaMthini wakhuluma kabanzi ngohlelo lokuthuthukisa ukulima esigabeni seBubi. Wathi asekhona amathalakitha ayisithupha azelimela abantu. Wabaxwayisa abantu ukuthi bakhuphe amatshe emasimini lokuthi bambe izigodo ukuze amathalakitha angaze afa.
Ngadana nje ukuthi akusavezwanga kabanzi ngokucacileyo futhi okuphelele ukuthi umnibizo uMtshane, uNdindikuyasa owalawula iMbizo wayengubani, engumuntu onjani lokuthi yini ayenzayo phakathi kwesizwe sikaMthwakazi. Kambe abemuli yakhe laMahlabezulu bayazi yini ukuthi yena ulele ngaphi umlawuli weNtamoyenkunzi, iNsukalitshone, uBhiyozo ozibunuzibomvu? Usekhunjini lomfula uThuli endaweni ethiwa yiNgome. Hawu, suka bo, kwakuleqhawe lapho!
