uMthunywa
kuloba uPathisa Nyathi
NgoMgqibelo odluleyo bekukhona umkhosi obizwa ngokuthi yiNAMA. Lokhu kutsho ukuthi National Arts Merit Awards ngokugcweleyo. Umkhosi lo ngodinga intshantshu kwezobuciko lobungcwethi. Kukhona izigaba ezitshiyeneyo ezigoqela lezi: abalobi, ababazi, abezemidlalo, abaculi , abasinayo kunye lemidlalo eyabomabonakude, ithelevizhini phela.
Umkhosi uqoqwa ngabe National Arts Council of Zimbabwe (NACZ). Lonyaka njalo umkhosi ube ukoBulawayo njenganyakenye. Umkhosi walonyaka ubungowetshumi lantathu kusukela usunulwa umkhosi lo. Isikhathi sonke umkhosi ubusenzelwa eHarare. Ngonyaka odluleyo umkhosi lo wawuseCity Hall. Kodwa ke lonyaka ububanjelwe ewoteleni iRainbow.
Bekungabizwa ozwayo emkhosini lo. Isethekeli esiqakathekileyo bekuNguDorothy Masuku. Abanengi bamazi njengoDoti, kanti lebizo lakhe lakilizwa kwathiwa ngowakoMasuka. Ukuqondisile ke lokhu watsho lokuthi unina ngoweSouth Africa kube kanti uyise ngoweZambia ebaLozini. Ibe igqokile yaceca intokazi kaMasuku izigqoko zayo zinkanyazela sengathi zinkanyezi emthaleni ngobusuku obukhasayo.
Ubekhona futhi uMpathi kaHulumende onguye okhangele uGatsha lukaHulumende olwaMasiko lobuCiko u-Andrew Langa. U-Eunice Sandi-Moyo omele uHulumende esabelwen sakoBulawayo ubekhona. Abanye abebekhona yilaba:Retired Colonel Tshinga Dube, Dr Sikhanyiso Duke Ndlovu, Middleton Nyoni ongusosiba edolobheni lakoBulawayo. LoMeya wakoBulawayo uMartin Moyo laye ubekhona lomsekeli wakhe uGift Banda bebekhona emcimbini lo.
Bebekhona abazingcitshi ezinhlangothini ezitshiyeneyo kwezobuciko. Abanye ngabebekade belande ukuzenikeza imiklomelo. Lonyaka abanqobi bebephiwa imali, izikhwama kunye lebakunikezwe zinkampani ezimbalwa. Phakathi kwabebenikeza imiklomelo bekulalaba: Reverend Paul Bayethe Damasane, uMeya lomsekeli wakhe, Felix Moyo, Voti Thebe, Priscilla Sithole, Adelis Sibutha, Dorothy Masuku, Professor Herbert Chimhundu, Davis Guzha loAlbert Nyathi.
Kubesobala ukuthi koBulawayo izinto kazihambi kuhle nanku phela balutshwana abazuze imiklomelo. Kababangaki .
Abalutshwana labo bebegoqela u-Israel Israel, lembongi u-Obert Dube, kodwa lo uphuma eFolosi. USifiso Mpofu intatheli yethlevizhini ephuma eGwanda layo idobhe umklomelo. Asazi ukuthi sekwathini koBulawayo ikakhulu kwezemidlalo. I-Amakhosi ebikade inqoba kayisatshoki njengezolo..
Abebethokozisa abantu ngemiculo yilaba: Jah Prazer, uDorothy Masuku, kunye leziNtombi zoMqangala. Le ke indoda abayibiza Prazer ibuthe imiklomelo emihlanu. Sonke sivumile ukuthi ilesiphiwo kwezomculo. Ivunula sengathi lisotsha lanxa isamukela umklomelo ibibonakala isitshaya isiluthi esabonwa ngamaNdebele.
Lekudleni lapha abanengi balala ngezibomvu. Sazitika ngokudla saze sajikijelana ngakho. Kodwa kwakhanya ukuthi indawo esasikuyo incinyazana. Nyakenye umkhosi wawenzelwe eCity Hall. Abantu babesanela kuhle. Ewoteleni bekuminyene ingekho indawo kugcwele amatafula lezitulo.
Asikakwazi ukuthi ngonyaka ozayo iNAMA izakwenzelwa ngaphi. Mhlawumbe ingabuyela eHarare. Amadolobho amanegi angeke abelendawo eyanelayo. Lokhu kungenza ukuthi umcimbi wenzelwe eHarare loba koBulawayo. Sizakwazi ngokuya kwesikhathi.
Pho nxa uBulawayo esehluleka ukuthola imiklomelo kuzakwenziwani? Lokhu sikutsho ngoba nxa bengasanqobi kungabadumaza kubaphe ubuvila kwezamasiko lobuciko. Kwezobuciko kufuna abantu bazizwe bengabapheleleyo abangayikudangala. Umfutho lomdladla kuyadingeka.
Isu liyafuneka ngoba abadlali bakoBulawayo bangacina sebezidela bengabe besasebenza kakhulu. Iqhinga liyafuneka sibili.
