uMthunywa
YiNtatheli kaMthunywa
ZILOKHU zingakukholwa izakhamizi zesigabeni seMafusini eTsholotsho kulandela ukuzwa ngenye injiva yakulesisigaba okubikwa igcine unwabu emoteni yayo okucatshangelwa ukuba kungabe kungumuthi wokuthuthukisa amabhizimusi ayo.
Injiva le, uMnumzana Joel Tshuma uselesikhathi eside egcine unwabu oluphilayo emoteni esala ukuthi abantu balukhiphe okudala ukuthi bamcabangele ukuba uthakatha ngalo.
Kuzwakale ukuthi uMnu Tshuma sowabalekelwa ngumkakhe ethi ugangile okuyikho okwenza ukuthi abantu bacabangele ukuba wabalekela unwabu lolu.
UMthunywa ukhulumisane lesihlobo sikaTshuma, esithande ukwaziwa ngokuthi nguMnumzana Ndlovu wathi unwabu lolu soluleminyaka ethile belubona ngefasitela emoteni njalo kavumi ukuthi kungene umuntu emoteni yakhe.
“Unwabu lolu soluleminyaka emithathu silubona emoteni kaTshuma. Ekuqaliseni sasingananzeleli ukuthi ngolwakhe ngoba wayesalukhipha lungabonwa ngabantu. Okwakungimangalisa yikuthi wawuthi ungaze ulukhiphe mhla ebuya evela eGoli uyalubona futhi.
“Okwakhathesi sokusesabisa ngoba kafuni lokuthi luphume emoteni njalo kafuni ukuthi igadwe ngomunye umuntu.
Ngokubona kwami unwabu lolu yilo olumdingela imali nanko phela selemota ezintathu lesigayo,” kutsho uMnu Ndlovu.
Ekhuluma lentatheli omunye wenjiva ezisebenza loTshuma eGoli oziveze ngokuthi nguBrilliant uthe sebesesaba ukumsondelela ngenxa yokugcina kwakhe unwabu emoteni.
“Thina emsebenzini sesize sisesaba ukumsondelela uTshuma ngoba yisibindi bani alaso sokuphila lonwabu emoteni.
Okungimangalisayo yikuthi unwabu lwakhe lolu ludlani njalo kungani lungafi. Unwabu lolu kalukhuli luhlala luluncane njalo kaluguquli umbala njengabanye onwabu lona luhlala luluhlaza kuphela,” kutsho uBrilliant.
Ebuzwa ngale indaba uMnu Tshuma uthe kafuni umuntu odlalela kuye ngoba uzamlimaza njalo ufuna ukwazi labo abatshele intatheli.
“Mina kangifuni umuntu odlalela kimi ngoba ngizamlimaza njalo akungithatheli isikhathi ukuqeda ngomuntu.
Engifuna ukuba kwazi yikuthi ngubani okutshele indaba le ukuze ngimfundise isifundo,” kuthetha uMnu Tshuma equma ucingo lwakhe.
