uMthunywa
Gladmore Ncube
KULENINA lePlumtree koKhame elitholakale ligebha ingcwaba lomkalo ebusuku, uMthunywa uyakuveza lokhu lamhlanje.
Kubikwa ukuthi uNkosazana Albertina Nyathi utholakale egebha ingcwaba lomuyi uApias Moyo, obengumkakhe, ngoLwesihlanu kuviki ephelileyo obeselamaviki amabili ebekiwe.
UMthunywa ukhulumisane lezakhamizi zakule indawo ebuzisisa ngalesisiga esilokhu siyindabamlonyeni esiqintini lesi.
UMnumzana Mfaniseni Ndlovu uthe kuliqiniso ukuthi uNkszn Nyathi watholakala phakathi kwamabili egebha ithuna lomkakhe ebhunyumunyu.
“Isiga lesi sethuse isigaba sonke ngoba asikaze sikubone ukuthi umuntu ozilele umkakhe uyavuka ebusuku agebhe ithuna lomkakhe engakahlali ngitsho lenyanga eyodwa.
“NgoLwesihlanu olwedluleyo ngavuka phakathi kwamabili ngisiya egangeni ngabona kulomuntu ogebhayo emangcwabeni akoMoyo, ngathi ngisondela eduze ngisithi ngike ngiphose ilihlo ngathola kuyimihlola yodwa ngambona uMaNyathi egebha ingcwaba lomkakhe.
“Lesi isiga sangethusa kakhulu ngehluleka lokuthi ngimbuze ukuthi wenzani ngasibathela ngejubane ngaqonda ekhaya ngavusa abantu ukuthi babuye bezongibonisa imihlola. Isimanga saba yikuthi bathi befika abantu samthola engasekho salandela unyawo olwangena emaguswini lwacitsha,” kutsho uMnu Ndlovu.
UMthunywa ukhulumisane loNkszn Nyathi ngaloludaba yena othe ngamanga ngalobobusuku okuthiwa watholakala emangcwabeni wayengekho ekhaya evakatshele kweyinye indawo.
“Abantu bayangisukela, okwakuqala bangibulalela umkami ngobuthakathi, lamuhla sebesithi bangithola ngigebha ingcwaba lakhe, kambe ngiyabe ngingumuntu onjani okhala ngapha egebha ingcwaba lomkakhe.
“Ngalobobusuku okutshiwo ukuthi ngatholakala ngigebha ingcwaba lomkami ngangingekho mina ngiye eNtoli esibhedlela ngiyelaphisa umzukulu wami, ngalala khona ngaze ngaphenduka ekhaya ngoMgqibelo ebusuku,” kuchaza uNkszn Nyathi.
UMthunywa ukhulumisane njalo loSobhuku wakule indawo, uMnumzana Sikhwili Moyo othe uyalwazi loludaba njalo lumethuse kakhulu ngoba uyaqala ukubona isiga esinjengalesi sisenzakala endaweni yakibo.
“Isiga lesi siyasazi njalo kuliqiniso ukuthi uNkszn Nyathi watholakala ebusuku egebha ingcwaba lomkakhe. Wathi ebuzwa ngaloludaba walandula wathi abantu bayamzonda bamqambela amanga,” kuphetha uSobhuku uMoyo.
