uMthunywa
Cornelius Luphahla
ZIDIDEKILE izakhamizi zesigabeni seMalundu eBinga ngemva kokuba elinye inina lakule indawo litholakale ligalule phakathi kotshwala ebelibupheka.
Isiga lesi senzakale emavikini amabili adlulileyo lapho uMaria Mpande atholakale egalule emhiqweni wotshwala wafa okucatshangelwa ukuthi ubedakiwe.
UMthunywa uxhumane loMnumzana Nkosana Nkomo ongumakhelwane kaNkzn Mpande wathi ucabangela ukuthi umuyi wayedakwe kakhulu aze agalule emhiqweni.
“UNkszn Mpande wadlula emzini wami ntambama edakiwe njalo ethwele obunye utshwala. Kuthe kusisa ekuseni ngezwa sokuthiwa usebhubhile utholakale ewele ngekhanda efatshini yomhiqo.
“Ngokubona kwami okwenza wehluleka ukuphuma efatshini yikuthi wayedakwe kakhulu njalo labantwabakhe basebelele njengoba kwasokusebusuku,” kutsho uMnu Nkomo.
UNkosazana Ethel Mpande oyisihlobo sikamuyi uthe ukufa kukamuyi kuyabasolisa kakhulu njengemuli njalo bacabangela ukuthi kulomuntu omgangeleyo.
“Ukufa kukadadewethu njengomdeni sibona kusobala ukuthi kulomuntu omgangeleyo ngoba wayengeke abulawe yikuwela emhiqweni. Okunye njalo umuyi wayehlala ebupheka utshwala kodwa akukaze kuvele ingozi ngabo.
“Ngalokhu kuyazikhanyela sibili ukuthi uhlungiwe njalo lathi kasisoze sihlale phezulu kwezandla thina sibona ukuthi kulokuganga phakathi kodwa sizazama amanye amacebo okwenzileyo azibonele,” kutsho uNkszn Mpande.
Usobhuku wakule indawo uMnumzana Komuyendo Ncube ebuzwa ngale indaba uthe laye iyamethusa kakhulu ngoba iyaqala ukwenzakala esigabeni sakhe.
“Kuliqiniso ukuthi kulenina eliwele emhiqweni lafa asazi ukuthi kwakuhambe njani. Ngokunjalo indaba le iyangimangalisa ngoba iyaqala ukwenzakala esigabeni ngakho ngixwayise izakhamizi ukuthi zinganathi kakhulu utshwala ngoba kungaba lengozi,” kuphetha uMnu Ncube.
