uMthunywa
Thokozile Mbedzi
KULENINA leJotsholo elibhubhe kuviki ephelileyo kulandela ukuwa ebhasikilini lithwelwe ngumkalo.
Kubikwa uNobuhle Luphahla obeleminyaka engu-35 ubhubhe ngemva kokuwa ebhayisikilini akade litshovwa ngumkalo uNhlonipho Ndlovu besiya koBulawayo litshaywe ngenye imota ebizama ukwedlula enye.
Ekhuluma lentatheli kaMthunywa uMnumzana Busani Moyo uthe kube lusizi olukhulu ngoba abantu bahlala bethwalana ngamabhayisikili.
“UMnu Ndlovu ubethwele umkakhe uMaLuphahla ngebhayisikili kodwa ngokusweleka kwenhlanhla omunye umtshayeli obezama ukubedlula wasebatshaya okuyikho okubangele ukuthi umkakhe awe wahle wafela lapho.
UNdlovu yena walimala.
“Kube buhlungu okwenzakeleyo ngoba lo obezama ukubedlula kazange ame watshaya wachitha. Kodwa lo onguye ayefuna ukumedlula wama njalo nguye owaphathisa ngokuyakwazisa amapholisa,” kulandisa uMnu Moyo.
Isikhulumi samapholisa esabelweni seMatabeleland North uInspector Glory Banda ebuzwa ngodaba lolu uvumile wathi bamukele udaba lwendoda eyatshaywa yimota ithwele unkosikazi wayo.
“Sichwayisisa udaba lwendoda eyayitshova ibhasikili ithwele umkayo eyatshaywa yimota kwabangela ukufa komkayo.
“Sicela labo abangabe belolwazi lomuntu owabatshayayo ukuthi azise amapholisa aseduzane laye,” kuphetha uInsp Banda.
