uMthunywa
Cornelius Luphahla
ZIBUKELE ibhayisikopo yamahala izakhamizi zesigabeni seDlawa, eNkayi ngemva kokuba elinye inina lakule indawo litholakale linqunu egumeni lakomakhelwane okucatshangela ukuthi belithakatha.
Isiga lesi senzakale kuviki ephelileyo lapho uNkosazana Nompilo Nkomo otholakale enqunu emzini kaMnumzana Kelvin Mathe ethi ulahlekile okudale ukuthi abantu becabangele ukuthi ngumkhunkuli, uMthunywa ukuzwile lokhu.
Kuzwakale ukuthi abakibo bakaMaNkomo bathi behlukana laye sebesiyalala ngakho bamangala nxa besizwa sokuthiwa utholakale enqunu koMathe.
UMthunywa uxhumane loNkosazana Litha Masuku wathi wayekhona mhla kutholakala inina leli koMathe njalo kwamethusa kakhulu.
“Mina ngathunyelwa umntwana ngabakoMathe ukuthi ezongibiza kusekuseni. Ngithe ngifika ngathola uMaNkomo emile egumeni enqunu bethi bathe bevuka bamthola ekhonapho. Ngemva kwalokho ngamembathisa ngelembu ngoba kwasokugcwele abantu abangamadoda. Sathi simbuza ukuthi ufike njani wathi ulahlekile.
“Lokhu kwangimangalisa kakhulu ngoba akulamuntu ongalahleka ebusuku ayetholakala emzini womuntu.
Ngokubona kwami uMaNkomo wasindwa yisikhonkwane sakoMathe,” kutsho uNkszn Masuku.
Ekhuluma lentatheli uMnu Mathe uthe indaba enjalo yenzakala emzini wakhe wayibikela usobhuku ngakho usalindele ukuthi ithoniswe.
“Kuliqiniso ukuthi ngathola uMaNkomo enqunu emzini wami ekuseni ethi ulahlekile kodwa lami njengomuntu omdala ngazibonela ukuthi yisigangi. Ngalokhu ngisalindele ukuthi usobhuku atsho ukuthi sizayithonisa nini ngoba ngifuna agezise umuzi wami ukuthi wangena njani enqunu,” kutsho uMnu Mathe.
Usobhuku wakule indawo uMnumzana Danisa Ncube ebuzwa ngale indaba uvumile ukuthi uyayazi njalo iyamethusa kodwa kakayithonisi.
“Indaba yenina elitholakale koMathe linqunu ngiyayazi sibili njalo lami ngabizwa ngazibonela ngamehlo ngakho lokhe ngingelankani ngayo,” kutsho uMnu Ncube.
Imizamo yokukhulumisana loNkszn Nkomo yehlule ngoba ucingo lwakhe lwalile ukungena.
