uMthunywa
Flora Fadzai Sibanda
KULENINA lakoBulawayo elileminyaka engu-63 yokuzalwa elenze imbali kulandela ukubeletha ngendlela ye-In Vitro Fertilisation Procedure (IVF).
Lesi yisiqalo kuleli njalo wenze lokhu encediswa ngodokotela beBulawayo Assisted Reproductive Technology (BART). Ngeminyaka yalo yokuzalwa, kubikwa inina leli libengomunye wabesifazane abahlanu kuphela emhlabeni ukubeletha ngalindlela.
Kuhlelo lokubeletha nge-IVF, amaqanda owesifazane avuthiweyo ayaqoqwa, akhitshwe ayevundiswa yibudoda endaweni egcinakeleyo ngabodokotela. Sekulapho, iqanda elivundisiweyo liyedluliselwa esibelethweni.
I-IVF ingenziwa nxa owesifazane ele-Fallopian tube evalekileyo okwenza kube nzima ukuthi iqanda lihlanganiswe kumbe lalapho kuvaleke indlela yokuya esibelethweni.
Izithandani zingakhetha i-IVF nxa owesifazane elenyama ezikhula esibelethweni (ama-uterine fibroids) engaphazamisa ukufakwa kweqanda elivundileyo.
Ekhuluma lentatheli, umqondisi weBART, uDokotela Jephat Moyo uthe ukubeletha kwenina elileminyaka yokuzalwa engu-63 kuyivelakanci njalo bayajabula ukuthi kuphumelele.
“Ku-IVF ngeke sithi kuleminyaka ethile yokuthi lolu hlelo luphumelele kodwa amathuba mancane kakhulu kulabo asebekhulile. Ngicabanga ukuthi emhlabeni kungaba labesifazane abahlanu asebezithwele sebeleminyaka engu-60 kusiya phezulu,” kutsho uDkt Moyo.
Uthe kodwa ngeke akwazi ukutsho okunengi mayelana ngenina leli, wathi alifuni ukuxoxa kabanzi ngodaba lolu. Kubikwa omama abanengi abakhulelwa ngohlelo lwe-IVF abafuni ukuxoxa ngendaba zabo ngoba kwandise ukuthi kube lensolo emphakathini.
UDokotela Moyo uthe ukuphumelela kuhlelo lwe-IVF okwakhathesi kuphakathi kwesilinganiso esingamatshumi amane lanhlanu ekhulwini (40-45 percent) njalo abantwana abedlula ikhulu lamatshumi amabili lasikhombisa sebezelwe kulandela ukuvulwa kwendawo yabo.
“Ukuze umuntu abelethe ngalindlela, kumele ahlolwe. Okokuqala sihlola ukuthi yiphi inkinga umuntu alayo besesibona ukuthi ngeke yini ilawulwe ngokusebenzisa eminye imithi. Nxa konke sekwehlule, yikho lapho esisebenzisa khona i-IVF,” kutsho uDkt Moyo.
“Kudingeka ukuthi owesifazane ahlatshwe ijekiseni okwensuku ezingu-12 njalo usuku ngalunye kumele abhadale imali elinganiselwa ku-US$150 kusiya kuUS$200.”
Uthe indawo yabo ye-BART inikeza uncedo lakulabo abavela khatshana lakoBulawayo.
UDokotela Moyo uthe umntwana obelethwe nge-IVF ufana labo bonke abantwana kodwa inkinga isekuthini umphakathi ulembono eyahlukeneyo ngalokhu.
“Akekho ofuna ukuzihlanganisa le-IVF ngoba esesaba umphakathi,” kutsho uDkt Moyo.
