uMthunywa
Uthanda iWhatsApp, ngimtshiye yini?
Umbuzo
NGILIJAHA elileminyaka yokuzalwa engu-29. Ngicela ungincede muntomdala. Ngilentombi ele-21 years. Inkinga bengifuna ukuyithatha kodwa yona ithi ngime kancane. Inkinga nansi ngimenzela konke okusemandleni ami kodwa lumuntu akalali ngeWhatsApp. Ngizibuza uthi ukhuluma labangane ngo-3 kumbe ngo-2 ekuseni mina ngilaye. Sengicabanga ukutshiyana laye, ngiyabe ngenze iphutha yini. Uthi kungani ngingamthembi?
Impendulo
Mtshiye lo mzukulu wami nxa ulokhu ukhuluma laye engalaleli yekelana laye. Bengingazimiselanga ukukhuluma njalo kodwa iqiniso limgceke ungaze umthathe uzakuhlupha okwedlula khonapho. Ngokomthetho wothando, akulamuntu ovunyelwa ukuthi angene phakathi kwenu lobabili ngaphandle komntwana eliyabe selilaye. Wena kufana lokuthi uyisitandali kumbe umatholwane amsebenzisayo ukuthola akufunayo nanko phela uyatsho lokuthi umupha yonke into ayifunayo. Koze kube nini elokhu esithi umthembe yena esenza into ekwenza ungahlaliseki?
Mkhulule umntanabantu azihambele kulabo athokoza labo.
Sihlala sonke kodwa kangikhiphelanga
Umbuzo
LINJANI Khulu? Ngihlala lendoda njalo sesileminyaka eyisithupha sisonke. Uhlupho Khulu yikuthi akaziwa ngakithi. Silomntwana oleminyaka emithathu ndawonye. lnkinga ila, ufuna ukuya ekhaya lomntwana lo uthi ufuna ukuyamtshengisa abakibo. Ngimvumele ahambe laye na njengoba ngakithi bengakaze babone muntu wangakibo ezovela. Khulu nceda ngididekile.
Impendulo
Iminyaka eyisithupha engafiki ngakini kutsho ukuthi kulento ayisolayo ngawe mzukulu. Asazi ukuthi kuyini. Wena mkhuthaze aphangise ayebona abakini ngoba kuyingozi ukuhlala lomuntu engakuthathanga. Bona abangakini bathini ngalokhu?
Nxa esithi ufuna ukuyatshengisa abangakibo umntwana myekele akwenze lokhu mhlawumbe abakibo bangabona umntwana bazamkhuthaza ukuthi athathe sebebona umzukulu. Kodwa into eqakathekileyo yikuthi lawe uhambe labo kibo ukwenzela ukuthi iqiniso liphume obala. Nxa engala ukuthi uhambe kutsho ukuthi vele akalaso isifiso sokukuthatha. Yenza kanjalo mzukulu funa umyeni wakho lowo ulabantwana wena wenziwa inkundla yentokozo yakhe khona lapho elihlala khona. Nxa esala ukuthi lihambe lobabili kibo wena hamba lomntwana kibo.
Akulanyawo olungelampumulo, ubuzisise kuhle ukuthi abazali bakhe basaphila yini kibo, kanye labomalume labobabakazi. Kanti bona abalivakatsheli yini, buza indlela kubo, bangakutshela uthathe umntwana ngekhefu umlandele ekhaya kibo uzathola elosapho lwabantwana, wena ubizwa ngesithuko esithi uyimpahla yasedolobheni, abanye abantu batshova izimota yena utshova wena.
Ubaba kangikhulisanga ngubani ozakudla amalobolo?
Umbuzo
Ngicela ukubuza ukuthi njengoba ubaba engazange angikhulise akazange angilobole futhi, ngakhuliswa ngumalume nxa sengisiyalotsholwa ngubani obiza amalobolo? Ngumalume loba ngubaba ongizalayo? Imali yakhona yenziwani? Ubaba sesisazana.
Impendulo
Umuntu obiza amalobolo ngumalume endawonye lobaba wakho. Okwendlela yakho emhlophe kule indaba yikuthi ubaba aphiwe inkomo yokhalo athi angayinikwa ayinike umama wakho. Nxa umama wakho sewabhubha ngakibo kamama wakho ukhona ofanele ukuthi ayiphiwe inkomo yokhalo, noma ubaba wakho athengelwe ijazi, isudu kanye lezicathulo akunikwe kuthiwe ngokwakhe. Ubaba wakho uphelela khonapho kuthi amalobolo akho ngakamalumakho.
