uMthunywa
Umkami uyangitshaya
Umbuzo
NGITHEMBA uqine saka Khulu. Sengilenyanga ezingu-18 ngendile njalo ngilomntwana. Umkami laye ulowakhe umntwana lomunye umama. Khulu ngiphila impilo ebuhlungu kakhulu angisazi ukuthi ngenzeni sengathi ngathathwa yinyamazana ngokwayo. Lokhu ngikubone sesihlala sonke. Umkami katshayi uyabulala ngiyake ngiqede amalanga amathathu kusiya kuviki ngivuvukile. Khulu ngingavele ngiphambanise ngiyabulawa kwezinye izikhathi lanxa ngingonanga lutho ngiyatshaywa. Yena kaphambanisi njalo kabongi ngingaze ngenze okuhle.
Okunye okungizwisa ubuhlungu yikuthi kwesinye isikhathi ngithethiswa phambi komntanakhe. Lokuhlangana emacansini akukho sihlangana kanye ngenyanga mhla efuna yena. Ngenzeni khulu ngidabukile enhliziyweni.
Impendulo
Indaba oyikhulumayo iyangivavula amaphaphu ngicine sekungathi ngingumntwana wenyamazana abantu bengekho. Mzukulu ungaqali ukulalela labo abathi umuntu okutshayayo ngokuthandayo, akulanto enjalo kungakho ngithi hamba emapholiseni angavele akutshaye uyewabikela. Sokulomthetho othiwa ngowe-Domestic Violence Act okhangelele khona kanye ukuchumisa abafana lesikliwi somkakho ophila laso. Ungesabi ngitsho ukuyabikela amapholisa ngoba indoda le izacina ikubulala utshiye umntanakho. Mzukulu okunye njalo okuqakathekileyo yikuthi uzidingele umsebenzi usebenze ukuze wazi ukugcina umntanakho.
Ufuna ngingene esithenjini
Umbuzo
Khulu ngingumama oleminyaka engu-29. Angendanga. Ngithandana lomunye ubaba othetheyo. Uhlupho engilalo yikuthi ubaba lo uyesaba ukuzongibona nxa umama wakhe omzalayo ekhona. Bengicela ukubuza ukuthi kungabe kulothando yini Khulu kumbe ngizichithela isikhathi. Wayethe ufuna ukuthatha isithembu Khulu. Ngicela ungeluleke ngoba isikhathi siyahamba.
Impendulo
Ngiyabonga mzukulu wami. Uthando lukhona kodwa ngolokweboleka. Indoda yakho le yakhuluma kubi ilonina bachothoza isithembo bebabili. Kanti indoda yiyo ethembuzayo hatshi unina. Ngitsho ukuthi indoda yakho yenza isifungo yavumelana lonina othi isithembo kasifuni. Lendodana yasikholwa okutshiwo ngunina okokuthi lomkakho wacina engasasifuni. Sekumficile okwafica abanye abalesithembu. Sekumkhathaza ukuthi uzaxakulula njani izinto ayezixoxa lonina. Khangela khathesi ijaha lakho selisesaba unina ingathi lithembuzela yena unina.
Kanti umsebenzi kamama ngowokwamukela omalukazana abalethwa ngekhaya. Into engalamula le inkinga yikuthi umzalele umntwana. Umntwana ozamzala laye nguye ozakuba ngusodombo ozaqeda yonke le inkinga.
Akusizi ukuthi wena udlulele phambili. Indlulela phambili le iyingozi, ilanyulwa kuphela yikuthi uhlale lendoda yakho lomntwana. Indaba ekhona la indoda yakho le funa ilobuqili obuthize obokuthi wena uyaziwa ngumkayo.
Yena wasekuceba emfazini wakhe, umkakhe wasecela ukuthi uninazala wakhe amvikele. Nxa uzamzalela umntwana nguye ozalamula konke lokhu. Nxa ungazithwala abadala bangakini bathumele abantu bayebika isisu ngakibo laye ekhona kuzabonakala ukuthi bayakufuna kumbe hatshi. Umuntu ongakufuniyo ngunyanewenu. Umuntu ozakuthanda ngunyokozala esebona umntwana omzeleyo wena efanana loyisezala. Indaba enjalo iqedwa njalo.
Nxa okulempondo sekwembuliwe emgodleni kuzabonakala onguye kanye okuhlukuluzayo. Umendo uyasetshenzelwa awubalekelwa. Yenza njalo ntombi yami.
Abazali kabafuni mkhwenyana ongasonti lathi
Umbuzo
Linjani Khulu? Ngilejaha engithandana lalo kodwa uhlupho yikuthi abazali bami bathi kumele ngithathwe ngumuntu esisonta sonke. Mina ngileminyaka engu-25 njalo ngiyakholwa ukuthi sengimtholile usofa silahlane wami. Ngenzeni ukuthi abazali bami bamukele ijaha lami ngoba bathi ngingaqali ukuletha umuntu esingela kholo olufananayo. Nceda Khulu angifuni ukwehlukana lesithandwa sami.
Impendulo
Ngiyakhuhluzeka mzukulu nxa ngifunda amazwi owakhulumayo. Ukukhomba lokuthathana okwalezi izikhathi yilokhu, umuntu uthandana lomuntu osemhlabeni ahlala kuwo, ngakho into le kufanele ikukhathaze. Kuyinto enzima kakhulu ukuzibophela ejaheni elilokholo lwesonto lona lingelathando ngentombi elikhonza layo. Pho ngisapota wena, akulunganga ukuzibophela emuntwini ongelathando kuwe. Lokhu kucina amajaha lezintombi zesonto efanayo besehlukana ngoba behlanganiswe lukholo lwenkonzo kanti-ke abantu bahlanganiswa luthando lokuzwanana.
Ngicela sibili mzukulu wami, hamba uyetshela umalumakho noma ubabamkhulu wakho loba ugogo nxa esaphila.
Ubacele lababantu ukuthi ucela ukuthi bathwale udubo lwakho, ubatshele ukuthi amajaha esontweni yakini kalathando akholwa ngoba efuna amantombazana. Bangehluleka cela kubabamkhulu, ugogo loba ubabakazi ukuthi uyemangala emapholiseni. Lingani lona ibhiza lingeqela esibayeni samadonki kuzalwa imbongolo.
Kulengcasiselo enkulumeni le eyokuthi imbongolo kutsho ukuthi ibhiza libambe indonki iganyavu. Pho lina umntwana lalo umuntu ofunwa ngabazali bakho uzabizwa kuthiwe yini ngoba engazalwanga ngothando. Ngakho ungamekeli usofa silahlane wakho ngoba uthando yikufa silahlane hatshi ukufa silahlane. Ungamdanisi uPrince wakho, futhi ubatshele ugogo lokhulu ukuthi ngicela indawo yokuzalela umntanami. Angifuni kubizwa ngamabizo amabi ngenxa yokuthi ngithandana lomkhethwa wami.
