uMthunywa
Umkami uthi ngihambe endodeni yami
LINJANI Khulu? Ngingumama olabantwana abangu-4 ngendile kodwa ubaba wabantwana uselomunye umfazi lomntwana. Kasabuyi lomholo endlini ngingambuza ungiphendula esithi ngihambe endodeni yami. Ngenzeni Khulu ngoba mina kangilayo eyinye indoda engiyaziyo?
Impendulo
Ngiyaphila mzukulu wami. Duduzeka ntombi kababa ungambuzi ngalokho agijima ngakho. Kuthathe njengothuli lwamadube wona ethuswe yimpisi. Zama ukunanzelela lokhu, umuntu owayengummeli wakho ekwendeni kwakho ukhona na? Lo ngusodombo. Noma engumuntu omdala noma omncane owayekumele lisiyavela yikho lapha-ke okubonakala amandla kasodombo, nguye othunywayo ukuyabika kibo kajaha noma kulo ijaha. Umbiko lo uthi abantwana yizithelo ezimisa umuzi ziyadla. Kungaba njani abantwana bethu abanike ukudla lami besengidlela khonapho ngoba angisananzwa. Amtshele ukuthi ngicela asihlanganise. Angiyizondi into yakhe le entsha aseyibonile. Ngithanda sibe ngabantu banye ngaphansi kophahla lwakhe. Abuze ukuthi umama lo omutsha uzenelisa yini ukugcina abantwabakhe laba engilabo.
Umuzi uqiniswa njani?
Ngihlala ngisizwa abadala besithi umuzi uyaqiniswa. Ngiyazibuza lami ukuthi njani? Ngicela ungichasisele Khulu.
Impendulo
Mzukulu igama elithi umuzi litsho into ezinengi ezinkulu. Ngizathanda ukukuvezela ukuthi umuntu wesintwana ungumuzi, ulomuzi ngakho angikwazi ukuthi utsho wuphi umuzi. Sesizakhuluma ngekhaya. Kuyikukholelwa kwenengi labansundu ukuthi ikhaya liyabethelwa izikhonkwane kuyinto enhle khonokho ukubethela uqinise umuzi kusiya ngokukholwa lolwazi lwakho ngobuthakathi kodwa nxa ungakholwa ukuthi kulobuthakathi labathakathi ungazikhathazi ngokuqinisa umuzi. Zama inhlalo enhle losapho lwakho lizisebenzele kuhle kungelamcabango othi kuqiniswe umuzi. Iqiniso liyaqinisa umuzi. Angali ukuthi kulabantu abaloyayo, bakhona. Ngesinye isahluko leso.
Ukuqinisa umuzi imvamo yakho kudala ubuyanga. Utshone uphila ugodle ugebhezi ongalwaziyo kumbe lukhakhayi lwendwangu ukuze kuthiwe unzima. Mkhulu lumsebenzi owubuzayo. Yikho ubona abanye abantu bengasayi emakhaya sebezihlalela emadolobheni lapho okungelazinto ezinengi ezikhulunywayo ezinjalo. Ungananzelela abantu bona labo abathi baqinise izinto zabo benza kube lomoya ovunguzayo uhitshe abantu, bagule abanye ngenxa yokuphatha izinto ezingaqondakaliyo. Impendulo epheleleyo ephuma kimi ithi qinisa umuzi ukuze uhlale ungela kuthandabuza. Lawe uziqinise kulabo abakwazi ukuqinisa. Lokho ngikutsho ngenxa yemali lenzuzo. Imali lenzuzo enengi ingumkhokha womkhuhlane. Nxa ulakho lokho ufanana le-pole le-booster. Ubonwa langubani basebekuncifela, bakucabangele izinto ezinengi, ziqinise uqinise umuzi kodwa ungawuqinisa ungahambi umemeza njengomuntu ovuthela itolopita yebhola. Kwenze uhlale ungelavalo. Lokhu kufana lokuthi kuthiwe kulenunu.
Umkami ule-sim card elihlala ku-wallet
Ngingumama owendileyo, umkami ule-sim card ehlala ku-wallet, ngenye iviki ubuye edakiwe ngasengivula i-wallet yakhe ngabona kule-sim card. Uvuke esiya emsebenzini ngafaka i-sim card kufoni yami ama-messages aqala ukutheleka awabafazi kwaze kwafona omunye ngakhuluma laye wethuka ukuthi ngingumkakhe. Ngimenzeni umuntu onjalo, ngidabukile emoyeni wami Khulu.
Impendulo
Mzukulu ungaze waginya isikhuni somlilo silamalahle. Nxa ungafuni ukubona indwangu, ungayi entabeni. Lezi zinto okuthiwa ngama-cellphone sezichithe imizi eminengi ebizihlalele kuhle. Ngiyaxolisa emhlabeni wonke ozafunda leliphepha. Kwapheleliswa endulo kwathiwa indoda yinja. Ungahamba uye lapho okulala khona inja ungamangali nxa ulunywa yibutata. Into leyo eyenzakeleyo izakulimaza kanti uyise wabantwabakho ulithemba lakhe.
Uyikuphumula kuye manje wena usubhidliza uthando lwenu. Ungabohlala ekhitshini ngoba isitshebo kwesinye isikhathi siyakutuka sigcwale umlotha kodwa ubuye usigezise. Kabadli yini abantwana lobaba? Xola ntombi yami.
Uphambanisile ubaba. Ngabantu abamenza ulunya, kambe wena nxa umbona evela ebhawa edakiwe esiza kuwe awuboni ukuthi ulawe enhliziyweni ungafaki izinto zebhawa enhliziyweni. Awalale ngawotshwala lawomazwi.
Ungayibona futhi ifoni yakhe kodwa ukwazi ukuthi etshwaleni lapho okunathwa khona kulezinto ezinengi. Indoda yakho iyabe izisomela labantu laba.
