uMthunywa
Umkami ulala ehofisini yakhe
Umbuzo
NGENZENI Khulu umkami ulala ehofisini yakhe. Uthi uyenzela ukuthi avuke masinyane angaselwa emsebenzini.
Ulengubo khonale emsebenzini. Sengizwile ngokulala ngedwa njalo lesikhathi sesiside ngingamazi.
Ngingowesifazane njalo igazi lami lilokhu lisatshisa.
Impendulo
Uhlupho lwakho lubonakala lumumethe impande ezinengi ezehlukeneyo sibili, okokuqala kungenzeka ukuba ihloka selibuthundu, ubaba wembethe ingubo yenhloni nje ukuba aziveze kuwe, usevala ngomsebenzi kube kanti ukusebenza akuqali ngaye sonke besisebenza izolo, sasesilahla amajogwe ngokukhula. Okwesibili kungenzeka ukuba kuledlalicatsha eselizithaphuzela uluju lwakho nje mzukulu.
Okunye kungaba mhlawumbe ubalekela wena, ngesinye isikhathi alihlabeli kuhle lapha ecansini, abe sesesaba ukukutshela abone kukuhle nje ukuzihambela ethule. Konke lokhu kukupha inqobe yokuba dingisisa kabanzi imfulo ezala lelithumba elingaka. Hlala phansi lomkakho umbonise ubuhlungu bokufulathela ingubo akhethe ukuyakudla lamaqhe nje egangeni. Kungehlula libabili kuhle ukuba ulande omunye wesihlobo esiseduze kakhulu umazise ukuba ekhaya lapha imbiza kayisabekwa eziko usufile ngephango. Kuzalunga mzukulu, kodwa iqiniso, hatshi lesisenzo asivamanga.
Labemsebenzini bathini uma umuntu elala ewofisini.
Kasakhulumi lami umkami
Umbuzo
Khulu baqinisile abadala nxa bethi umendo kawutshayelwa amathambo. Mina ngaqala ukuthandana lomkami ngomnyaka ka2013. Ngangisesengumntwana wesikolo. Ngacina ngimitha ngabalomntwana ongumfana.
Abangakithi bangixotsha ngekhaya bethi ngiyohlala lalo ongiphe umthwalo. Eqinisweni ngangingakazimiseli ukwenda kodwa ngahamba ngayahlala laye. Wahamba ngakithi wayavela kwabakuhle kwabanjalo kodwa khathesi sesilomnyaka olengenye engahlangani lami emacansini. Kakhulumi lami ngaphandle nxa efuna ulutho kimi.
Kathengi kudla kwezinye izikhathi sicina sisiyakudla komakhelwane. Sengicabanga ukubuyela ngakithi ngoba ngeke ngithi ngilendoda.
Impendulo
Ivele wena ngesintu kawendanga uhlezi lapho owaxotshelwa khona ngoba kwasokulo hlupho oluthile okwakumele lulungiswe. Kuyadingakala ukuba ubonisane losodombo wenu ngohlupho lwakho, ungabalakho ukubonisana lezihlobo zakwenu zala eziseduze, ukuze zanelise ukukhuluma lomkakho. Nxa kulokhu kusala ukulunga emva kokukhulumisana ungaba lakho ukuba ucele usodombo akubisele ngakini njalo afike azitsho zonke izizatho ezikubophise impahla zakho waze watshiya umendo. Kuyadingeka ke mzukulu ukuba wembathe ijazi lokubekezela kulesisikhathi esinzima kangaka empilweni yakho.
