uMthunywa
Umkami senginyanyisa
KHULU: Ngithemba uqine saka wena osiphathisayo ngemibono yokuqinisa imizi yethu. Ngingumama oleminyaka engu-40 yokuzalwa, ngithethwe njalo ngilabantwana ababili. Uhlupho lwami lumi kanje: Umkami wangiphoxa kakhulu ngokuba lomntwana phandle komtshado wethu. Kungasenani wacela uxolo waphenduka ngekhaya.
Uhlupho-ke solulapha, nxa sihlangana emacansini kangisela mizwa ngitsho uyazikholisela nje yedwa. Iqiniso yikuthi mina enhliziyweni yami kangimxolelanga kungakho nxa sihlangana emacansini uyanginyanyisa. Ngenzeni Khulu ukuze ngixole uthando lwami lwakudala luphenduke ngoba yimi engilimalayo ngaphakathi?
Impendulo
Lolu luhlupho olutholakalayo mzukulu kubomama abanengi, ikakhulu nxa bengaphanjaniswa ngomkabo njengalokhu owakwenziwayo. Siyazi ukuthi kubuhlungu lokhu owakwenziwa ngumkakho kodwa ngiyacela mzukulu mxolele ngenhliziyo yakho yonke hatshi ukuthi uhlale ulenqubu. Umuntu wonke wenyama uyaphambanisa ngitsho lawe uqobo. Umkakho mthande kakhulu, yiyo kuphela indlela yokuthi ujabule ngesikhathi socansi. Lalela-ke ingozi yokungajabuli kwakho emacansini ingaqhubekela phambili umkakho ulakho ukuthi abuyele njalo phandle lapho ayekubalekele wayakhona usale udubeka labantwana. Kungakho-ke khohlwa ngokuphanjaniswa owakwenziwayo ngumkakho, umthande njengakudala. Ungekela ukwenzanjalo uzasala ukhala sedinge abamthandayo.
Yikho yini lokhu Khulu?
Khulu: Ngicela ukubuza kuliqiniso na ukuthi umuntu engafelwa ngumfazi kumele ageziswe ngoba elakho ukufelwa ngabafazi abathathu belandelana? Nxa kunjalo kulomkhuba yini lokhu, kwenziwa yinyanga, ngamaPositoli kumbe ngomunye nje umuntu? Nginceda Khulu.
Impendulo
Kungamanga aluhlaza tshoko lokho. Okuyikho yilokhu, owesilisa angafelwa ngunkosikazi kumele azile amacansi okomnyaka kumbe iminyaka emibili. Isizatho yilesi, uyafelwa elabantwana abancane. Bazagcinwa ngubani kodwa ngaleli ithuba alithetheyo eleminyaka emibili, kwenza anakekele abantwana abatshiywe ngunina. Kumele kubonakale kakhulu futhi ukuthi uzilele unkosikazi wakhe. Kulokhu okuthiwa yikugeziswa kuyikuhlambulula igazi lendoda ngemva kwesikhathi eside ezilele umfazi wakhe. Okwesibili yikuthi okunye ukufa kubuya ngamathunzi amabi phakathi komuzi. Ithunzi lonalelo elenza abantu abatsha bafelwe, lixotshwa ngokugeziswa. Ukugeziswa lokhu akusiyonto okufanele ibekhona yingqondo yokwesaba ukungenisa umfazi endlini yokulala okuyikho lapho okwakulala umkamfelwa. Njengabantu ababengelasepa iphunga lakhe beligeziswa ngezihlahla.
Usesebenza kasangiboni
Khulu: Ngilomnyaka ngihlala lomfazi. Sonke lesisikhathi ubesenza kahle ehlonipha esenza yonke into eyenziwa ngumuntu wesifazane. Wasuka wathola umsebenzi lapho asebenza kuze kube sebusuku kwavela kwaqala indaba.
Kulezinsuku uselala engekho endlini, usedelela, kasangihloniphi ngitsho, angisamazi okwezinyanga embhedeni.
Khulu inkinga ngiyamthanda lumuntu futhi ngiba lomcabango wokuthi mhlawumbe wangidlisa. Ngicela ungisize ungibonise indlela.
Impendulo
Ibuhlungu inkinga ophakathi kwayo mzukulu. Nxa kuyikuthi ukuthathana kwenu kwabayisivumelwano sabazali, ayibuyele leyondaba lapho eyaqalisa khona. Kungasikho ukuthi iyabe ilanda ukuthi lehlukane ngoba lokhu yinto embi kakhulu. Lapha liyabe libikela abadala ukuthi bamkhuze. Akusoke kubensuku ezingaki isikhuni singabonakalanga sibuya lomkhwezeli. Ngicela ubeyindoda elesibindi, uthumele umuntu ohloniphekayo kuye, amtshele ukuthi ingcwaba lakhe seliseduze. Umtshele ukuthi akunanzelele ukuthi lokhu kuziphatha abanengi kwababulala. Nxa lingelaye ummeli ngalindaba nxa lisonta yana kumfundisi kumbe emuntwini omdala. Ufike umangale kuye, uzambiza amkhuze. Nxa esegula kuhle kwaziwe ukuthi uhlalele uthando. Zama ngamandla akho ukuthi linto uyibikele abadala.
