uMthunywa
Akusatsho ukuthi ngihlangane lobaba
KHULU angazi kumbe uzangisiza kodwa ngilethemba lokuthi uzanginceda. Ngicela ukubuza ukuthi amaphilisi okuvikela ukuzithwala ama-control pills ayehlisa yini imizwa yocansi ngoba sengileminyaka emithathu ngiwanatha njalo nxa ngihlangana lobaba kuyabe kungatsho. Kungabe kubangelwa ngamaphilisi la kumbe ngokunye?
Impendulo
Uhlupho olunye mzukulu ludinga kakhulu amadokotela, yiwo alobungcitshi ekwaziseni abantu ukuba amaphilisi athile aphambanisa ngani emzimbeni. Ngesinye isikhathi mzukulu indaba yemacansini ifuna ukulungiselela kwengqondo. Kungabi lohlupho olusithekileyo kudinga umuntu adlale umdlalo ekhululekile engqondweni. Zamani ukukhangela indlela elihlangana ngayo emacansini lizame lani ukutshintsha indlela zakhona hatshi ukuba lendlela eyodwa lesikhathi esifanayo sokuya emacansini.
Sengizithwele njalo mina ngisamunyisa
Ngithemba uphilile Khulu. Ngingumama olomntwana oyedwa njalo ulenyanga ezintathu uhlupho yikuthi sengisuke ngazithwala mina ngimunyisa. Ngenzeni ukuthi umntanami angaguli ngoba usemunyele. Ngimkhuphe yini ebeleni?
Ngeluleka Khulu ngingakatshiywa ngumntanami ngoba ngizwa kuthiwa ukumunyela kuyabulala.
Impendulo
Kuqakathekile mzukulu ukuba uyebona odokotela ngohlupho lwakho lolu, balakho ukuthi bakuncedise ngendlela zonke. Akula bufakazi mzukulu ukuthi ukumunyela kuyabulala, yindlela nje abantu abahamba ngayo engelasisindo.
Impendulo egcweleyo ulakho ukuyithola iloba esibhedlela esiseduze lawe.
Ngilotsholwe komalume kumbe kobaba?
Litshona njani khulu? Umama wamithiswa ngubaba kodwa wala umthwalo lokhu kwenza ngondliwa ngugogo ozala umama. Ngokuya kwesikhathi umama waphinda wazala umnawami lobaba kodwa bengahlali bonke. Ubaba wayesivakatshela lomama laye esiyamvakatshela. Ngithe sengifunda e-secondary ubaba wangithatha wayahlala lami logogo ozala ubaba. Ngesikhathi engithatha wayesithi wenzela ukuthi ngithole imfundo engcono. Lanxa ngangihlala lobaba umama nguye owayengibhadalela i-school fees engenzela lokunye okwakufuneka esikolo. Ngiqeda ukubhala uFomu 4 ubaba wathi ngibuyele komama.
Khulu ubaba ekukhuleni kwami wangithengela isigqoko esisodwa lezicathulo zesikolo. Khathesi sengithole ijaha elifuna ukungithatha, uhlupho selulapha, ubaba uthi ngizolotsholwa emzini wakhe kukanti omalume bathi ubaba kumele abuye kibo azolobolisa ngoba yena kalobolanga njalo yibo abangondlayo. Mina angisakwazi ukuthi ngithini ngoba lomama laye uyafunga uthi kobaba kayi. Ngenzeni khulu sengiphambene, kulungile yini ukuthi ngilotsholwe ubaba engekho? Umtshado wami uzabe ubusisekile na?
Impendulo
Ngesintu esiqondileyo mzukulu, umntwana oyinkazana kuthiwa uyazihlenga. Lokhu kutsho ukuba uyihlo uyabikelwa ngokulotsholwa kwakho njalo kuvame ukuba abekhona kodwa konke okuphumayo kusala konyoko yena kathathi lutho ngoba kalobolanga. Yikho okuphenduka kube ngamalobolo enu lonke. Nxa esidla usengadla kwabakumelelayo ngokuba wena uyabe usuhlenge bonke. Uhlupho yikuba wena abantu sebethanda ukudla baze bakhabele amasiko ehlathini. Kuyenzeka ukuba ulotsholwe engekho, akulacala sibili okuqakathekileyo yikuba bamazise nxa efuna engabuya kumbe athumele. Ukubusiseka komtshado kusemoyeni wakho lesoka lakho nxa lihlanyele uthando lwamampela olufutha phansi phezulu.
Ngiqhubeke ngithandana lendoda yomuntu na?
Ngingumama oleminyaka yokuzalwa engu-24 ngilabantwana abangu-4 ngenda ngimncane ngazala abantwana sasesisehlukana lomkami. Khathesi ngithandana lendoda elomkayo kodwa mina akusiso sifiso sami leso ngoba ngibona angani ufuna ukudlala nje. Kambe khulu ngingamthola yini owami kumbe ngiqhubeke nje layenalo engilaye ngoba ngiyabadinga ngiyabaswela, kabafuni umuntu olabantwana.
Impendulo
Lokhu ukudinga kumbe ukuzingela uswele kuvamile, ungathi wena ufuna indlovu uyezingela emagcekeni shuwa. Bakhona labo obaba abafana lawe, abalezimuli zabo kodwa badinga inhlalo efana leyakho. Ngibona uhlupho wena usukukhangelele ebantwini abaqala ukuthathwa abafuna ukuqala imuli hatshi ukuqhubekela phambili. Indaba zothando kazibi zinhle nxa umuntu engenakhona ngensolo. Nxa ubona ukuba awulanjabulo kuhle ukuphuma. Ukuqhubeka sekusiya ngawe ukuba ikusasa yakho uyibona njani ezandleni zalubaba. Kwesinye isikhathi ungabona kaluvilibali kube kanti yilo ubambo lwakho lonalolu. Abesilisa ngesiko lwesintu balakho ukuthatha isithembo, hlala laye phansi ubuzisise ukuba ikusasa yenu ifukeme ubuhle kumbe lisemahlangeni.
