uMthunywa
Ngahlukuluzwa ngimncane
Ubaba wami wangilahla ngisemncane, ngakhuliswa ngumama. Umama wacina esehlangane lowesilisa owayemdala kulaye ngacina sengikhuliswa yibo bobabili. Ubaba laye wayelowakhe umntwana ongumfana kodwa omdala kulami njalo bengimbona njengomnewethu. Ngolunye usuku umfana lo wangibizela endlini yakhe njengodadewabo kanti ufuna ukungikhipha ubuntombi bami, wathi ngingatsheli muntu, wangisongela ngakho konke okubi.
Waqhubeka ngalo umkhuba ngaze ngaba mdala ngisesaba ukubikela umama ngoba ngicabanga ukuthi ngeke bangikholwe futhi ngisesaba lokuthi sizaswela indawo yokuhlala lomama nxa ingavela indaba. Manje sengikhulile, ngilomuzi wami kodwa angikaze ngitshele muntu ngokwangehlelayo. Ukuhlukumezeka kwami sekuphambanisa umuzi wami. Uyangibekezelela umkami. Ngiyake ngihlale nje iviki yonke ngingamkhulumisi. Ngiyazi ukuthi engikwenzayo akukuhle kodwa angazi ukuthi ngenzenjani. Ngilimele ngaphakathi. Ngicela usizo.
Impendulo:
Ukuhlukumeza ngokocansi kulicala. Okokuqala okufanele ukwenze yikuhlala phansi lomkakho umazise ngesimo owadlula kuso usakhula. Okulandelayo yikwazisa imuli yakho ikakhulukazi umama wakho lobaba ukuze bazi ngokwenzakala kuwe phambi kwabo kodwa bengakwazi. Okokucina, udinga ukwelulekwa. Khumbula ngeke uyinqobe into ongakwazi ukubhekana layo mathupha.
Ngijola lomfundisi
Ngingumakhwapheni kamfundisi wami. Lokhu kwaqala sakudlala ngoba ethi ulenkinga emtshadweni wakhe njalo kabasayazi lenkonzo yasekamelweni lonkosikazi wakhe. Ubengitshela zonke inkinga alazo emtshadweni wabo.
Manje inkinga yami yikuthi sengimthanda kakhulu. Sengilobukhwele ngitsho lakunkosikazi wakhe. Angifuni ukumfaka enkingeni lebandla kodwa angazi ukuthi ngenzenjani ngoba ngikhathele ukufihla uthando lwethu.
Impendulo:
Ungena njani ezintweni zababili abatshadileyo? Nxa babelezinkinga, wena ubuzabasiza njani kizo? Umtshado lomtshado ulenhlupho zawo, okungachazi ukuthi ngeke zicazululwe ngakho kubalulekile ukunika abantu isikhathi sokubhekana lenhlupho zabo bebodwa. Ayikho into okumele ikuhlanganise lomuntu otshadileyo.
Uselabangane abayizitabane, kaselandaba lami
Sileminyaka emibili sitshadile lomkami. Konke bekuhamba kuhle ngaphambi kokuthi abe labangane ababili abayizitabane. Selokhu bafika empilweni yethu akasakhombisi mdladla enkonzweni yasekamelweni. Kuze kube yimi engimsukelayo ukuze sihlangane. Uyindoda ezithandayo njalo elozwelo kakhulu. Kulezi insuku uba lesikhathi asichitha labangane bakhe laba.
Akafuni ngitsho ngibe khona nxa bezovakatsha loba ebavakatshela. Ngiyesaba ukumbuza ngoba angiboni ngizakwenelisa ukumelana leqiniso lalokhu engikucabangelayo ngabo.
Impendulo:
Alikho iphutha ekubeni labangane ebehlukeneyo lani. Ungesabi ukumbuza ukuthi kuyini osekutshintshe kuye.
Okunye kumele libe labangane abafanayo. Ngakho akulandingeko yokuthi ungabi khona nxa evakatshelwe ngabangane bakhe. Ake ube khona nxa befika abangane ubone ukuthi kwenzakalani. Kulapho ozabona khona nxa kukhona okutshaya amanzi.
