uMthunywa
Ngihlala ngisemacansini
LINJANI bakoMthunywa? Ngilohlupho Khulu, ngicela uncedo lwakho. Khulu ngihlala ngisizwa sengathi ngihlangana lowesilisa emacansini ebusuku kanye lemini. Kangiphumuli ngitsho Khulu. Kungabe kubangelwa yini? Ngicela uncedo, sengidubekile.
Impendulo
Mzukulu kukhanya sengathi uyasetshenziswa ngemithi yobuthakathi loba ngabe-satanism. Inengi labantu abasetshenziswa ngendlela le balohlupho lokungalotsholwa kumbe ukucina bengathathi, ukuswela inzalo, ukulahlekelwa ngabantwana bebancane, ukuchithekelwa yimizi, ukuthathwa baphinde baliwe, ukudubeka, ukwenyanywa ngamadoda kumbe ngabesifazane, kanye lokuswela imisebenzi.
Umoya lo, mzukulu ucina ulimaza isibeletho sakho. Lokhu kwenza njalo ucine usizwa ubuhlungu ngaphansi kwenkaba kanye laseqolo. Kwezinye izikhathi isibeletho sicina sichitha amanzi amhlotshwana kumbe ahlangane legazi. Ungaphuzi mzukulu ukudinga usizo ngoba lokhu kuyalimaza ngamandla impilo yakho. Dinga usizo emabandleni kumbe kubosiyazi. Ungaya emahofisini eZinatha aseduzane lawe uyedinga uncedo.
Angisatholi omunye umntwana
Sabona Khulu, ngithemba ubelomnyaka omutsha omuhle. Ngingumama oleminyaka engu-28 olomntwana oyedwa oleminyaka yokuzalwa engu-8. Khulu ukuthi ngithole omunye umntwna kuyehlula. Ngangilamasale kodwa aqunywa.
Kule inyanga ngingene esikhathini amalanga engakafiki. Bekumele ngingene mhlaka 12 kodwa ngangena mhlaka 2 ngaphuma amahlwili ayesabekayo. Bengithanda ukubuza ukuthi ukuze ngithole esinye isisu kumele ngihlangane lomkami ngemva kwensuku ezingaki. Nceda Khulu umuzi wami ngiyawuthanda.
Impendulo
Ngiqinile mzukulu, ngithemba lawe unjengami. Mzukulu ukuphuza ukuzithwala kungabe kubangelwa yikuthi mhlawumbe imithi yokuhlela imuli obuyisebenzisa kayikaphumi yonke emzimbeni. Bekungaba kuhle nxa bengingaba kwazi ukuthi usulesikhathi esinganani wekele ukusebenzisa i-family planning yakho. Kuyenzakala njalo ukuthi ungene esikhathini insuku zakho zingakafiki ngenxa yokukhathazeka emcabangweni (stress), ukuguquka kwesisindo somzimba wakho, ukusebenza kakhulu kumbe ukuhamba.
