uMthunywa
Ngifisa ukuya vela kodwa . . .
KHULU: Ngiyindoda eleminyaka engu-30 ngilonkosikazi engihlala laye kodwa kangaziwa ngakibo. Uhlupho engilalo yikuthi Khulu ngingathi ngifuna ukuyavela ngakibo uyangibuza ukuthi ngilemalini abesesithi incinyane kakhulu leyomali. Ngenzeni Khulu kunzima ukugcina imali mina bengifisa ukuthi ngihambise leyo engilayo ngibe sengibuyela ngingathola enye. Ngicebisa Khulu ngoba kangifuni ukuthi ngihlale lomuntu ngingaziwa ngakibo.
Impendulo
Ukuhlala lomntanomuntu ungaziwa ngakibo yikumumatha inkalakatha yengozi enzima kakhulu, kuyabe kulefu elimnyama elizulazulayo phezulu ekhanda nje mzukulu ngoba, lomuntu ohlezi laye engagula uzambika ngaphi njalo kobani futhi ufike uthi wena ungubani wangaphi njalo otheni. Isintu siyakuveza ukuba umkhwenyana yinxoza nje, kungakho kutsho ukuba ukukhupha imali kwabozala akupheli. Kungakho-ke, kuhle ukuba ukhulume lezihlobo zakhe eziseduze okungaba ngodadewabo kumbe obabakazi ubabonise ukuba wena uphetheni njalo ufuna ukuyaziveza kwabozala. Khulumisanani uhambise lokhu okuphetheyo ngoba awuyi thenga kodwa uyacela ubuhlobo.
Uyangihlupha ngezocansi
Khulu: Ngilejaha elingihlupha nsuku zonke ngokufuna ukuya emacansini lami. Mina ngileminyaka engu-21 yokuzalwa njalo ngazithembisa ukuthi ngizahlangana emacansini mhla ngitshada kodwa umfana lo usengihluphile. Ukumthanda ngiyamthanda kodwa ngicela izeluleko Khulu. Ngingamtshela njani ukuthi azwisise ukuthi mina ngifuna ukulindela ilanga lethu lomtshado.
Impendulo
Lowo jaha akayethethela abakibo abonge kakhulu ngoba akuvamanga ngensuku zanamuhla ukuhlangana lentombi nto sibili.Hlala laye phansi umchasisele ngesifiso sakho, njalo umbonise ukuba uma engumuntu oqotho akangagijimeli ukuya emacansini, kalinde usuku lomtshado wenu.Kungenzeka ukuba yena vele akalandaba lomtshado kodwa udinga ukudlala ngawe akwenyelise umoya wakho nje. Zama ngamandla wonke ukufela eqinisweni njalo lakundlela okholelwa kiyo ngobuntombi bakho. Ungavumi ukulahla ubuntombi bakho ngokufuna ukujabulisa umuntu nje.Uthando oluqotho luyabekezela, aluzenzisi njalo aluhlukumezi futhi alukhahlamezi, nxa selukhahlameza lufuna amacansi isikhathi singakafiki, hatshi asithando lolu. Bekezelani bazukulu lilungise ilanga lenu lomtshado hatshi ukuphanga ucansi.
Angitholi ijaha
KHULU: Ngiyintombi eleminyaka yokuzalwa engu-26 ngicela ukubuza Khulu ukuthi ngenzenjani ukuthi ngithole ijaha eliqotho ngoba mina kungathi sengehlulekile. Besengileminyaka emibili ngithandana lejaha njalo savumelana ukuthi sizahlangana emacansini ngemva komtshada kodwa ujaha lo wamithisa omunye sahle sehlukana. Khathesi kulomunye futhi ebesengithandana laye osephinde wangitshiya ngemva kokumithisa. Angazi Khulu kambe ngenza iphutha yini ngokuvala imilenze yami?
Impendulo
Ngiyajabula mzukulu ukuzwa ukuthi asesekhona amantombazana agcina ubuntombi babo ukuze bube ngobabomkabo. Yinto enhle kakhulu leyo mzukulu. Ungabi lendaba ukuthi amajaha othandana lawo ayakutshiya, kutshengisa ukuthi babesiza kuwe besithi kwehlile kanti hatshi. Mzukulu kuvele kwenziwa njalo ukuze ube lomuzi oqinileyo njalo kulezi insuku ungazama ukuthabisa ijaha ulakho ukuthi ucine usukhala ngoba lelo jaha selikuthelele imikhuhlane ethelelwana emacansini labaleka. Bekezela mzukulu uzaze umthole umzukulu oqotho ofuna ukwakha lawe umuzi oqinileyo. Umtshado muhle kakhulu, wulindele.
Ngehluleka ukuzibika entombini
KHULU: Ngilijaha elileminyaka yokuzalwa engu-18. Khulu udubo nantu, ngilamahloni okokuthi ngiyehluleka ukuzibika entombini. Ukhona untombazana esengimbonile, angilali ngaye Khulu kodwa udubo yikuthi angenelisi ukuthi ngimtshele ngalokhu. Ngingambona lokumbingelela ngiyehluleka, ngizizwa ngiginqa izandla lamakhwapha, amadolo la exega ngingavele ngimbone.
Impendulo
Kudala lekweluseni ayekhona amajaha anjengawe, lawo-ke ayehamba ayekhonjiselwa intombi ngodadewabo umtshado uze ucine usiba khona sibili. Lawe akuzame ukubeka isibindi njengendoda umtshele luntombazana ngesifiso sakho sonke. Ungaba lakho ukuthuma umgane wakhe ahambe ayekuxhoxhozela umfula ngobhulo wena uthi usulandela indlela isivuliwe. Manje ungehluleka okulula kangaka mzukulu pho ucansi uzamkwanisa kumbe uzalambisa umntanabantu nje inyawo zisemanzini.Ngilethemba ungabalakho ukuxoxisana lomngane wakhe, ulakho ukuba akungenise enjanjini lawe icine usiba lesabelo. Okunye ungaba lakho ukususa udaba lwakho ngocingo nje kuphela, wena uzathi ususiya indlela iyabe isivulekile. Ngabe uthe ungumuntu wensonto bengizathi dinga abadala bebandla balihlanganise kulokhu okufisayo.
