uMthunywa
Ngiyopha nxa ngihlangana lobaba
NGITHEMBA uphile kuhle emzimbeni Khulu. Ngicela ungincede ukuthi ngabe kwenziwa yini uku-bleeder nxa ngihlangana lobaba njalo ngingakuqeda ngani? Khulu zikhathi zonke singahlangana ngiyangcolisa ingubo kodwa kangizwa buhlungu. Sengisesaba ukuthi mhlawumbe kungabe kuyikuthi ngile-cervical cancer?
Impendulo
Kulusizi ngesimo sakho mzukulu wami. Into enhle yikuba uyebona amadokotela, yiwo azakuxakulula phezu kohlupho lwakho lolu. Okwesibili kuyadingeka ukuba ubikele lomkakho, ngaloluhlupho ukuze laye akuncedise ngazo zonke indlela.
Indoda kayisangibambi lokungibamba
KHULU nceda bo umuzi wami usuchitheka. Ngingumama oleminyaka engu-30 ngilomntwana oyedwa uhlupho engilalo yikuthi umkami uthi kaselayo imizwa. Sengidubekile Khulu ngihlale laye njani njengoba engasangibambi lokungibamba. Sengifile ngomzwangedwa. Ngilamulela Khulu kambe lokhu kungabe kubangelwa yini kumbe ubaba lo uselomunye umfazi. Umkami uleminyaka engu-32.
Impendulo
Umkakho mncane kakhulu ukuba intambo zikagetsi zingawa kuye. Esintwini siyabe sisithi kwesinye isikhathi udle kwamanye amasimu bambopha.Kuyadingeka ukuba libikele abadala, omalume kumbe obabakazi ngaloluhlupho.Lilakho ukukutshela umalume ukuba uyasola imbiza ayisaphekwa ekhaya, njalo ucela ukuba uncedisane lomzukulu wakhe ukudinga izikhuni. Nxa kusiya phambili, lihambe emadokoteleni lilakho ukuthola usizofuthi.Lawe mzukulu zama phela ukudlalisa ukhulu lezinye izitho zomzimba wakhe ubone ukuba kuzaphetha ngani.
Ngangilala lomalumekazi
LINJANI khulu? Mina ngiyindoda eleminyaka yokuzalwa engu 40. Uhlupho lwami yikuthi angilamntwana njalo kangilamfazi. Mina ngakhulela kibo kamama. Ngathi ngileminyaka eyi-18 umkamalume wayelala lami nxa umalume engekho. Indaba le ngayibikela umama wadabuka kakhulu. Njengoba umama wayesendile kwenye indawo, indaba le wayitshela ubaba yena owacina engithatha. Kodwa ngenxa yokuthi ubaba wayengumyanga waswela inkomo yokulobola kugogo, ozala umama onguye owangondlayo. Mina khulu kangiseyindoda epheleleyo. Nginceda khulu ngiphakathi kwamalahle.
Impendulo
Kuyadingeka mzukulu ukuba uhambe uyebonana labo okuthiwa ngesingisi ngama “counsellor” bakuncedise njalo lixoxisane ngohlupho olwakwehlelayo. Balakho ukukuncedisa ukuba izolo ulibeke emsamo, ukhangele ikusasa yakho. Kuyadingeka futhi ukuba ungabona osiyazi bakuncedise phakathi kohlupho lolu. Kungenzeka ukuba wawuseqa kumbe umnika kamnandi lumama ogangileyo wacina ekubopha ukuba ukhulu avukele yena yedwa.
Ngilethemba kuzadlula mzukulu.
Ungenze isiwula wangidlalisa emacansini
NGIDABUKILE ngilapha Khulu. Ngahlangana lejaha phakathi komnyaka ka2014 sathandana njalo wayesala ukusebenzisa ijazi lomkhwenyana kungakho sahamba sayahlolwa sasesiqala ukuhlangana singazivikelanga.
Khulu ukuze ngivikele ukuzithwala bengisebenzisa ama-morning after pills. Kodwa ngasengisekela ukuwasebenzisa ngoba sengisesaba ukuthi ngingacina ngingasazithwali. Khulu ngithe sengizithwale ijaha leli lahle labuyelelana lentombi yalo yakudala. Okunye okungizwisa ubuhlungu yikuthi uyangifonela engichothoza njalo engihleka ubuwula. Khulu ngenzeni kangisebenzi njalo sengize ngifuna ukuzibulala.
Impendulo
Hatshi mzukulu, akuqali ngawe ukudlalwa ngabafana. Nxa ulezihlobo zakho eziseduze zibikele ngodubo lwakho bazakuphathisa. Kuhle ngoba ukhala ngokutshiywa ulengane eyodwa, abanye batshiywa sebeqede ithumbu.Okwesibili ulakho ukuhamba emthethwandaba uyedinga isondlo sengane. Ulakho ukuthola okungakusiza . Okunye kuyisifundo kuwe lakwabanye mzukulu, imilenze ayihanjwa ivulwa nje, umuntu lingakathathani okusemthethweni.U sekuhleka ukuba wawusebenzisa nje.Phezu kokukuhleka kwakhe vala indlebe wena.
