uMthunywa
KHULU sengidubekile ngokulala ngiphupha ngisemacansini lowesilisa kungaba semini loba ebusuku. Sengikhathele ngokungena lelibandla ngingene kwelinye.
Sengibona sengathi ukuzibulala kungangiphumuza kulo umthwalo engiwuthweleyo. Kangisakwazi ukuthi ngithini ngicela ungiphathise.
Impendulo
Mzukulu kayisuwe wedwa, bakhona abesilisa kanye labesifazane labo abaphupha besemacansini.
Lokhu kutsho ukuthi usetshenziswa yimimoya yabondofa emibi elakho ukubhidliza impilo yakho.
Ukuba yinsumbelume loba ukungendi, ukuba ngumfelwa kumbe ukubamfelokazi, ukuswela inzalo konke lokhu kubangelwa yimoya emibi.
Izehlakalo ezifana lokuswela kanye lokuba lesilumo ngezinye zezinto ezitshengisa ukuthi kukhona okwenzakalayo empilweni yakho.
Ondofa bandise ukusetshenziswa yizihlobo ezazimhlophe ingozi ezenziwa ngokhokho bethu. Ondofa laba benza ukuthi umoya lo uye kwabanye abantu bona bephila ngegazi ukuze bathole inotho.
Uhlupho lolu ludinga ingcitshi ezaziyo ukuluqeda.
Ungaya kubosiyazi abalezincwadi bakuphathise kuhlupho lwakho lolu kumbe uye emabandleni kodwa uqaphele ungayi abantwini abazakuqambela amanga befuna nje imali.
Ngisubuka isikhumba ngasese
Khulu: Linjani? Ngendile ngileminyaka engu-30 yokuzalwa labantwana abane. Ngisubuka isikhumba esithweni sami sangasese kodwa akubuhlungu.
Angisimuntu othanda izihlahla ukuthi ngabe ngithi yizo ezenzenjalo. Kungaba ngamalephelo yini? Nceda Khulu ngihlupheke kakhulu.
Impendulo
Hatshi bo, amalephelo yinto ebuhlungu ukwedlula yonke imikhuhlane njalo amalephelo aquma izandla, inyawo lamakhala atshiye umuntu eyisibhukubhuku somzimba ongelakuzinceda.
Zama ukuthi nxa ugcoba umzimba wakho ungaze wagcoba lomsinsila ngoba amafutha ungaginqa njengoba leyana yindawo ebuthakathaka ayagelezela khonaphayana besekusubuka nxa uhamba ngoba umoya ungena nzima.
Akuzame ukwenza lokhu kungehlula ungibhalele futhi.