uMthunywa
Ibele lami libuhlungu
KHULU ngithemba uqine saka ngoba lami ngiphilile lanxa ngikhathazekile ngempilakahle yami. Khulu ngikhathazekile ngebele lami elilodwa libuhlungu njalo sengicabangela ukuthi mhlawumbe ngilemvukuzane yebele.
Impendulo
Ubuhlungu bebele buvamile njalo kukalutshwana ukuthi kube yisibonakaliso sokuthi umuntu ulemvukuzane yebele. Lokhu kwezinye izikhathi kuyabe kubangelwa ngama-homoni (hormones) asemzimbeni ayabe engafinyeleli isilinganiso. Kwezinye izikhathi ubuhlungu bebele bungabe bubangelwa yisifuba ngenxa kokudonseka kwemisipha kumbe njalo zimbambo. Singakubalisa konke lokhu kodwa kuqakathekile ukuthi ubuze umbono kadokotela wakho ukuze ahlole abone ukuthi ubuhlungu lobu buvelela ngaphi.
Kangijabulisi emacansini
Ngicela uncedo Khulu. Ngangendile kodwa ngasuka ngoba ubaba lowo wayengihlukuluza. Ngake ngahlangana labanye kodwa hayi khathesi sengimtholile owehlukana lomkakhe, sesilomnyaka sisonke. Iqiniso Khulu yikuthi akukho engikuswelayo, njalo kangisoli lutho ubaba lo ulothando njalo uyangenzela konke nje owesifazana angabe efisa ukuthi owesilisa amenzele. Uhlupho Khulu lusemacansini kangizwa lutho nxa sihlangana, uyazama ukungiphulula kodwa kuyala ukuthi ngithokoze. Umbuzo wami Khulu yikuthi uhlupho lukimi yini njalo ngingaluqeda njani? Umkami ngiyamthanda Khulu, ngenzeni? Kwezinye izikhathi ngize ngifikelwe ngumkhumbulo wokuthi mhlawumbe yikho okwenza wehlukana lomkakhe. Ngiyabonga.
Impendulo
Awusatshongo mzukulu ukuba ihloka lakhe liyagamula kumbe libuthundu. Nxa kuyikuthi ihloka kaliphakami, kungabe nguye olenkinga kodwa nxa libukhali liphakama hatshi yena umsulwa-ke. Kuyadingakala ukuba konke lokhu ukubeke sobala. Ngezinye izikhathi inkinga kungabe ikuwe ngoba umkakho uyazama ngamandla onke ukuba akuphulule ukuze igazi litshise kodwa elakho lala lokhu liqanda mo. Kuyadingakala ukuba ubonane lezalukazi zikutshisise umzimba, ukuze owesilisa othandana laye engavele akuthinte uzwe igazi ligijima. Kuyadingeka futhi ukuba nxa ususiya endlini yakho lomkakho ukhohlwe yonke eminye imikhumbulo olayo ucabange wena lejaha lakho. Ungavumeli ukuya emacansini ingqondo zikhasa phakathi kwamalahle ngoba ngezake akujabulise ngitsho umkakho. Ungabona imbiza yabogogo isehlula ulakho ukuvakatshela laba ngesiNgisi okuthiwa ngama “marriage counsellor” balakho labo ukuxoxa lawe ukuze kubanguleke ithumba lakho.
