uMthunywa
Kafuni ukuthi ngitshaye umntwana
ANGAZI kumbe ngiyaphambanisa kodwa ngidinga uncedo kuwe Khulu. Umkami kafuni umntwana athintwe. Kafuni kuzwa ngimkhuza kumbe ngimtshaya. Pho ngimfundise njani nxa esithi angona engatshaywa? Khulu uhlala njalonje efuna ukungitshaya nxa ngingakhuza umntwana uthi ngiyamhlukuluza kukanti umntwana lo kezwa. Khulu ngimtshele njani umkami ngokuqakatheka kokufundisa umntwana umthetho esesemncane?
Impendulo
Ungakhulumi lomkakho, lungisa umntwana. Umbambe ngoswazi kakhulu nxa engaphambanisa. Angakucebela kubaba walele wena uthi ngithe ngizamtshaya yena uthi ngimtshayile.
Ungekeli umkakho ephambanisa umntwana. Nxa uthanda umntanakho kumele ubone ukuthi uyamkhuza njalo uyamqondisa lapho aphambuka khona ukuze akhule esazi umthetho. Umlamulankunzi luswazi, angithi lawe ngumntanakho. LeBhayibhili mzukulu likubeka sobala ukuthi uswazi kumele lusetshenziswe ukuze kwesulwe ubuwula emntwaneni.
Sengifuna ukwenda
Khulu kunjani? Ngileminyaka yokuzalwa engu-50, ngafelwa ngubaba wabantwabami eminyakeni engu-10 edluleyo. Umkami ngimzilele.
Sengifuna ukuthi ngabe ngiyathola umuntu wokuthi siphile sonke kodwa kangifuni kuthandana lomuntu othetheyo. Khulu ngingenza njani ukuthi ngibekwazi ukuthi lo ngumuntu ongifaneleyo. Lokhe ngabhujelwa angikaze ngithandane lomuntu ongubaba. Abantwana sebelemizi yabo bonke kungakho sengihlala ngedwa.
Impendulo
Into yile mama wami, umuntu ongubaba ozisondeza phansi kwakho qala umbuze ukuthi ulomfazi yini noma wake wathatha, nxa wake wabalomfazi labantwana bangaphi labo bantu khathesi? Angakutshela iqiniso lakhe leminyaka yakhe angaze aba ngumuntu oleminyaka emilutshwana kuleyakho. Kumele abe ngusowenu noma abemdala kancane kulawe.
Udadewethu ulobandlululo
Salibonani Khulu, ngilohlupho ngodadewethu osibandlululayo ngenxa yokuthi asizalwa laye kubaba kodwa umama munye. Siyiphathe njani lindaba Khulu? Ngeluleka.
Impendulo
Mzukulu esintwini sithi abantu bahlanganiswa libele phela. Bekufanele libe ngamathe lolimi lodadewenu lo. Kuyadingeka mzukulu ukuba kelidinge izihlobo zenu eziseduze lizilandisele ngaloludaba, lani litsho insolo zenu zonke laye atsho akusolayo ngani.
Nxa unyoko esaphila, kuyadingeka ukuba limlandisele ngohlupho lwenu, lizwe yena ukuba uthini, ngoba kuyisifiso somfazi wonke ukuba abantwabakhe bathandane. Lingayithuli lindaba mzukulu, yixoxeni lezinye izihlobo zenu zizalinika indlela njalo bazanelisa ukukhuluma laye udadewenu. Inyathelo elilithetheyo liyabukeka sibili, khulumisanani kuzalunga.
