uMthunywa
Silo Khulu
Angiselayo imizwa umkami wangikhuba
Umbuzo
NGICELA ungincede Khulu kangiselayo ngitsho imizwa kumkami. Angangibamba ngizwa sengathi ngiyanwayizelwa nje emzimbeni njalo kangisakholisi lemacansini. Khulu ngambona ngawami amehlo esemacansini lomunye umama kodwa uyaphika uthi kabathandani. Mina ngileminyaka engu-20 yena uleminyaka engu-24. Silomntwana oleminyaka emibili. Ngicela ukubuza ukuthi ngizaphinda ngibe lemizwa yini kumkami Khulu? Isenzo sakhe sangephula umoya.
Impendulo
Imizwa yakho mzukulu ifihlwe liqhubu olokhe ulibambile ngesenzo somkakho. Kuyadingakala ukuthi lixoxe kabanzi ngalesisenzo sakhe ukuze ukhulule umoya wakho. Tshelanani iqiniso, njalo lawe uthi uxola ubone ukuba iqiniso usulazi lonke. Xoxani langemikhuhlane yemacansini egcwele phandle, liphinde libonisane ngokuqakatheka kokuzigcina lina lemuli yenu. Kuyadingakala mzukulu wami ukuthi umtshengise uthando umkakho kodwa lokhu kuzakuba lula nxa engakutshela iqiniso elipheleleyo. Uzakuba layo imizwa mzukulu lingaxoxa ngodaba lolu. Laye akutshele iqiniso elizakwehlisa umoya wakho.
Umkami umuyi uyaphenduka ezolala lami ebusuku
Umbuzo
Ngingumfelokazi oleminyaka yokuzalwa engu-40. Uhlupho lwami lumi kanje: Ngangilotsholiwe njalo ngihlezi kuhle. Ngilabantwana abangu-3 labazukulu abangu-2. Umkami engakabhubhi saqeda iminyaka engu-2 singasahlangani emacansini. Khathesi umkami useleminyaka emithathu ebhubhile. Uhlupho oselukhona khathesi yikuthi umkami uyaphenduka ezolala lami ebusuku. Sengizamile ukuya kubosiyazi ukuthi angaphenduki kodwa kuyala. Ngicela uncedo Khulu mhlawumbe ungangihlenga emalahleni la ngiyatsha. Ngeke ngihlale lomuyi endlini.
Impendulo
Kawusatshongo mzukulu imbangela yokuhlala iminyaka eyisibili lingayi emacansini, bekuzasivula inkophe edabeni lwakho. Ngamalahle sibili mzukulu, kuyadingakala ukuthi lihlale phansi labomdeni bakoyihlozala, kunye labakini, lihlafune udaba lolu kabanzi. Lawe mzukulu kuyadingakala ukuthi ubethulele udaba lolu lonke, njalo ukuthi ubike konke ukuze abakibo babekwazi hlezi balendlela abazaziyo labo. Ubuzisise kubobabakazi kumbe kubodadewabo bomkakho ukuthi uhlupho olunje abazange bahlangana lalo na emulini kumbe phambilini. Kuyadingeka mzukulu ukuthi lihambe kubosiyazi selindawonye lezihlobo labo bayezizwela ukuze lincedisane. Lusebenzeni liyimuli uhlupho lolu, luzaphela nje masinyane.
Abantwana bomkami bakuyise kodwa kabafundi
Umbuzo
Ngingubaba ngathola umaqondana wami, sathandana kwabamnandi ngamtshengisa izihlobo zami laye wangitshengisa ezakhe, okwamanje ngilungiselela ukuyakhupha kibo kodwa sesihlala sonke. Umkami ngamthola ehlala labantwabakhe ababili abangabafana abafundayo. Mina lami ngilomntwana oyedwa ongumfana. Unkosikazi wathatha isinqumo sokuthi ahambise abantwabakhe kuyise njengoba ekhona, esebenza kodwa engabanakekeli. Mina kangizange ngaphawula kulokho. Okwakhathesi abantwana laba bahlala loyise kodwa kabasayi esikolo. Ngikhuluma nje kusukela ngoNhlangula nyakenye kabakaze balugxobe esikolo. Okungikhathazayo yikuba abangakithi bayakwazi lokhu njalo bayangisola kakhulu ngalokhu. Ngicela ungisize Khulu.
Impendulo
Mzukulu angithi otheza ukhuni uthatha lamaxolo alo, pho wena wathini ukuvuma ukhuni usehluleka amaxolo alo. Kuhle likhulumisane lomaqondana wakho mayelana lenhlalo yabantwana, njalo langesikolo sabo. Uma lingavumelana bathatheni lenze okufaneleyo ngabo ngesikolo ngoba yilo kuphela ilifa labo lakusasa elingabapha lona. Kuyadingeka futhi ukuthi ukhulume labakini ngaloludaba, kunye labakwenuzala bakho. Njengomuntu Usungubaba lapha ekhaya, kuyadingakala ukuthi ubuthanise imuli yonke, hatshi ukuthi idabukane phakathi.
