uMthunywa
Khulu: Ngilijaha elileminyaka engu-20. Ngalala lentombazana yami ngathola isiki. Ngiyesaba ukutshela ubaba ngalokhu kodwa ngiyakholwa ukuthi anganginceda. Ngenzeni?
Impendulo
LOKHU okwenzayo yikho kanye okutshengisa ukuthi uyamhlonipha umzali wakho. Kuyabongeka lokhu, iqiniso yikuthi dinga omunye owazi ukubeka amazwi kuhle loba engowesifazana akumele umtshele uyihlo kumbe umlobele incwadi. Akasoze abelolaka kodwa uzafunda inhlonipho olayo abesekuphathisa futhi uzathokoza ngoba intontisa iyabulala. Utsho lokutsho uthi baba ngiyaxolisa futhi ngiyesaba ukufa wena ungazi lutho ngesifo engilaso.
Uzakwamukela akuphathise. Phangisa umenze ubaba akwazi khonokho. Ukuvikela kungcono kulokubana uqumeke imizwa. Abanye bazinyumba ngenxa yalumkhuhlane.
Uthi ngiyehlala ekhaya
Khulu: Ngingumalukazana osakhulayo njalo ngihlala edolobheni kobabazala. Inkinga yikuthi umkami ufuna ngiyegcina abazali bakhe ekhaya, kodwa ngiyesaba ukuthi ngingahamba umkami uzasala esegila imikhuba lezinye izintombi njengoba laye esamutsha njengami. Ngenzeni Khulu?
Impendulo
UPHEZU komqolo weqiniso. Sesadlula leso sikhathi akufaka kuso. Mcele uthi kungabanjani sithumele ukudla lemali kubazali. Lilomntwana yini nxa lilabantwana kuphose kuzwakale, umbonise ngezwi elipholileyo ukuthi kuqakathekile ukuthi lihlale ndawonye ukuze kungacini sekulomunye ozadinga ugawulwayo. Lilenkomo yini? Vuma ngezizathu funa abazali abasenelisi ukukhangela impahla yenu esekhaya.
Ngiyesaba ukuqomisa
Khulu: Mina ngilijaha eselileminyaka engu-27, inkinga engilayo yikuthi ngiyesaba ukuqomisa. Ngivele ngiqhaqhazele nje ngingabona intombi ithutsha. Ngenzeni ngalokhu?
Impendulo
YINTO ekhona leyo, zama amacebo lawa alandelayo; thumela umngane wakho loba owakhe ayomnika incwadi yothando evela kuwe, ungalobi iphephandaba bhala umzila owodwa othi: Ngizulile ilizwe lonke akekho engimthanda njengawe uqambe ibizo lakhe lesibongo sakhe ubusucela impendulo ayiphathise lowo oyabe umthumile kuye.
Ubusunanzelela iqhude nxa liluma isikhukhukazi kulethonsi elithontayo ulicuphe uligcobe esiphaqeni sakho kuzakuthi ngemva kwalokho inhloni du. Ukumlobela ugwalo yisiqiniseko esingapheliyo, kuzakuthi sokulandela amafoni kodwa iqiniso eligodlile.
Ngiphupha ngisemangweni
Khulu: Mina njalonje nxa ngilele ngiphupha ngisemangweni, ngihamba ngebhasi loba imota encane kodwa ngingakwazi ukuthi ngilubhekisa kuphi. Kambe kungabe kusitshoni lokhu?
Impendulo
KUTSHO ukuthi ungahlanhlatha ungazuza imali lenzuzo yakho. Yicebe lobaba wakho loba umfazi wakho nxa ekhona wena wedwa nanzelela ungachithi inzuzo yakho labantu abangayisibo laba abaqanjwe phezulu. Thokozisa laba abathathu. Yekela ukuba lobungane ngenzuzo yakho labangane, ungacina udubeka sebekukhuthuzile. Enye ingozi zintombi ezingelaqiniso. Zona zifuna ukukutshiya egangeni, lasemajaheni kunjalo. Intombi ayime lejaha elilodwa ungaze wasabalalisa inzuzo yakho.
