uMthunywa
YiNtatheli kaMthunywa
UKUZIMISELA ekuthuthukiseni ezemidlalo sekulethe imivuzo kusikolo seLuveve High nanko ikolitshi yaso yomdlalo we-volleyball isibophe isivumelwano sokuthuthukisa lumdlalo isebenzelana lenhlanganiso yeZimbabwe Volleyball Association.
Lokhu kulandela isimemezelo seZVA sokunikeza inqwaba yamabhola, omambule kanye lezinye impahla ezisetshenziswa kulumdlalo.
Isikolo lesi sisungule ikolitshi lokulolongwa kwe-volleyball phakathi komnyaka lo.
Ikolitshi le ebizwa ngokuthi yiLuveve Volleyball Academy (Luvac) ibunjwe yithimu yabantwana bebambene labaphathi besikolo.
Ebikela uMthunywa ngaloludaba uBrian Manuel umsekeli kamgcinisihlalo weBulawayo Volleyball Association uthe bemukele ngentokozo ephezulu ukuvulwa kwenkundla yokulolonga eLuveve bakubona kufanele ukuba bakhulumisane labakhokheli beZVA banikeze impahla yokuphathisa.
Uthe lokhe kwaqala ukuba lemidlalo, iLuvac isitshengisele ukuthi izimisele ekuphakamiseni umdlalo loba sekutheni.
Ngomnyaka ophelileyo inhlanganiso yeZVA yabika ukuba isithole impahla ezanikezwa amaqembu asacathula kanye lezikolo ngaphansi kohlelo lwayo lokuvuselela umdlalo lokuhuga abadlali abatsha.
Iphephandaba likazulu lizwe ukuba impahla le yeza lapho iZimbabwe ikhangelele ukunxusa amazwe e-Africa kumqhudelwano wamazwe eAfrica.
Kuloluhlelo kukhangelelwe kakhulu ukuthuthukiswa kwe-volleyball lapho engadlalwa khona emalokitshini, emadolobheni akhatshana, emaphandleni lasemapulazini.
UManuel uthe loba kungakabi sobala ngesilinganiso sempahla, uleqiniso lokuthi iLuveve lamanye amakolitshi asacathula azathola kuqala kulamanye amakilabhu.
“Angifuni ukuthi ngikufake bhadla kodwa kulempahla zomdlalo ezatholwa yiZimbabwe Volleyball Association ngakho kungenzeka iLuveve ibengeyokuqala ukuphiwa phambi kwazo zonke indawo.”
Uncome kabanzi ukuvulwa kwenkundla yokulolonga wacebisa ukuthi kumele isetshenziswe langabanye abadlali abangaphandle kwesikolo iphinde ibengumzekeliso kwezinye izikolo.
“Ikolitshi leli kumele livule inkundla zisetshenziswe ekuthuthukiseni umdlalo we-volleyball esabelweni sakoBulawayo. Ukuze sinqobe lokhu, iLuveve Volleyball Association ayibe ngumzekeliso kwezinye izikolo lazo singule okufanayo.”
Uthe okwenziwe yiLuveve kuzancedisa ekuqiniseni lamaqembu amela iBulawayo ngoba kuyadanisa ukuthi isabelo seHarare kuthiwe yiso sodwa esilabadlali bohlonzi.
“Izikolo zeHarare ezifana leChurchill High ziqhuba kuhle kumincintiswano ngoba zilenhlelo ezinjenga lezi esizisungula eLuveve,” nguManuel lo.
