uMthunywa
KUNDATSHANA yethu yakuqala kwezeqoqo lenhlelo ezikhokhelwa ngumanyano kazulu lamapholisa i-Community Policing (CP), ngachasisa ukuba iqoqo leli ligoqela inhlelo eziyimibono kazulu engaphathisa ukuphungula ukudalwa kwamacala ezigabeni zabo lenhlelo zonke esezabonakalayo ukuba ziyasiza.
Zigoqela olwe-Community Relations and Liaison Officers (CRLOs); Police Constabulary; Neighbourhood Watch Committee (NWC); Home Officer Scheme (HOS); House Under Supervision Scheme; Junior Police Call; Business Against Crime Forum in Zimbabwe (Bacfoz); Crime Consultative Committees (CCC); Bases / Posts / Satelites lezinye inhlangothi zamapholisa ezibhekana lamacala athize anjengawe zifuyo, ukuhlukuluzana kwabantu lezinye ezinjalo.
Lamuhla-ke ngiyaziphetha lezinhlelo ngokuchaza esezisele ezibalisela phakathi, olwe-HOS; House Under Supervision Scheme; Bacfoz; Bases / Posts / Satelites lezinye inhlangothi zamapholisa ezibhekana lamacala athize.
Okunye okumqoka kulezinhlelo yikukhulumisana kuma-Suggestion Box / Hotlines le-WhatsApp.
I-HOS luhlelo olweza muva kwazo zonke. Kuloluhlelo, kuba lompholisa eZimbabwe Repulic Police (ZRP) oyedwa kumbe ixuku kusiya ngokuba lapho okumele bayesebenzela khona. kumi njani kundaba zakoCALA lomzali wakhe uSigilamkhuba. Amapholisa la asebenzela endaweni ethile okwesikhathi eside esazakala ukuba yiwo aphatha indaba zakulowomango kumbe isigaba, lanxa nje inkamba enkulu iyabe ikhona elawula ezinye zonke izigaba eziyigqagqeleyo.
Amapholisa la akhangelelwe ukudlelana kuhle lezakhamizi zonke zakuleso sigaba esesingesawo, ukuhlala phansi lezakhamizi lezo behlela amacebo okulawula umthetho, ukuhlela indlela zokukhulumisana ezinhle njalo eziphuthumayo, ukuphatha zonke izindaba ezidinga amapholisa kulesosigaba kanye lokuqhuba ezinye zenhlelo zeCP.
Uhlelo lolu ludume ngokuphungula ukudalwa kwamacala ezigabeni kanye lokuphuthuma ekuphatheni indaba ezidinga amapholisa ngoba abafisa ukubika indaba zabo emapholiseni bengasahambi imimango emide besiya emahofisini eZRP. Bakwethu lizananzelela ukuba kungeyinye yenhloso yeqoqo leCP ukuba izizalwane zakuleli kunye lezethekeli zethu zingahlupheki uma sezidinga uncedo lwamapholisa. Ikakhulu kudubo lokuba amapholisa akhatshana. Kumele amapholisa abonakale ebhoda, ehlala lozulu, esebenza laye lakho konke okufaneleyo okungenza umsebenzi wamapholisa ubelula uzulu laye ahlale ekhululekile.
Uhlelo lwe-HOS luphose lufanane lolwama-Base, amaPost lamaSatelite eZRP. Umahluko yikuthi inani lamapholisa ayabe ekuHOS liya likhula kuBase, Satelite lakuPost njalo njalo. Lokhu kuya ngobunengi bomsebenzi wamapholisa kuleyondawo edinga ukulawulwa ngamapholisa ajonge yona yodwa. Kodwa ke okubalulekileyo yikuba konke lokhu kugxile kuntando kazulu okhalaza ku-Officer-in-Charge wenkamba eseduzane laye uma kulendingeko yokuthi kube leHOS, iBase, iSatelite kumbe iPost. Ngakho-ke kunzima ukuphila impilo yokwephula umthetho ngoba manengi amaqhinga okukuzingela mhlobo wami. Kasiphileni impilo emsulwa. Kunzima yebo ye ngoba icala lembula ingubo lingene kodwa lapho esenelisa khona ukulivikela, kasenqabeleni.
I-Bacfoz yona liqula labosomabhizimusi abazinikelayo ukubambana lamapholisa belwisana lokudalwa kwamacala lapho abaqhubela khona amabhizimusi. Lokhu bakwenza ngokuqhuba imihlangano behlomisana ngamasu athile lamapholisa ekuvikeleni lokuphungula inani lamacala kuzisebenzi, ezindlini zamabhizimusi abo kumbe lakwabanye osomabhizimusi abakhelane labo.
Amalunga eBacfoz akhululekile ukucebisana ngemizamo ayenzayo emisebenzini yawo ukwenqabela ukudalwa kwamacala, okufanana lenhlelo zokuvikela ubuqili (fraud control strategies). Kwezinye izindawo, kuba lezigebenga ezihlasela onogada. I-Bacfoz ilomlandu wokufaka amakhanda ndawonye ivikele izisebenzi lezi. Ilakho njalo ukucela amaNeighbourhood Watch Committee (NWC) ukuba abhode endaweni yamabhizimusi abo bephathisana labonogada kuzozonke indaba zakoCALA lomzali wakhe uSigilamkhuba. I-House Under Supervision Scheme yona yikugcinelwa indlu yakho ngamapholisa ngesikhathi ungekho. Luhlelo olutholakala kuzozonke inkamba zeZRP ngokungelambadalo.
Ama-Bases / Posts / Satelites afanana lenhlangothi zamapholisa ezibhekana lamacala athize ezigoqela iCriminal Investigation Department (CID), Victim Friendly Unit (VFU), Minerals and Border Control Unit (MBCU), Anti-Stock Theft Unit (ASTU), lezinye ezinjalo. Loluhlelo lujonge ukusa amapholisa phakathi komphakathi ngoba kuyikho lapho okudalwa khona amacala. Akusamelanga amapholisa atholakale ezinkambeni ezinkulu kuphela kodwa ndawana zonke zelizwe njalo ejonge indaba ezithile ukuze aziphathe ngobunono baphezulu.
Ama-Suggestion Box / Hotlines / WhatsApp lama-website luhlelo lunye olujonge ukupha uzulu ithuba lokukhulumisana lamapholisa ebika indaba eziphathelane lamacala kunye lezigilamkhuba kumbe esipha umbono wakhe ngokulawulwa komthetho. Imbiko le ingathunyezwa kungela gama lomlobi ikakhulu uma engathandi ukuziveza. Okuqakathekileyo ngumbiko kuphela hatshi ukuthi uvele kuzibani.
Thumelani imibono yenu kunombolo yeWhatsApp u -0783185092 kumbe ebulenjini ku – [email protected] / [email protected] / [email protected]
