uMthunywa
Cornelius Luphahla
INHLANGANISO yabomama iLupane Women’s Centre ithuthukisa ezokulima eLupane nanko phela intshantshu kwezokuthunga ezikule inhlanganiso ziphiwe imivuzo yamakhuba okulima.
Inhlanganiso le yenze lokhu ngeviki ephelileyo lapho ebiqhuba umkhosi womncintiswano wabantwana besikolo labadala kwezamasiko, khonale eLupane.
UMthunywa uphuthume wayafika kule indawo wakhulumisana loNkosazana Sihle Nyathi omunye wezakhamizi ezithole umvuzo wekhuba lokulima wachaza ukuthi ulokujabula okukhulu ngokuthola ikhuba.
“Mina ngileminyaka eyisithupha ngithunga ingcebethu lezinye izitsha kodwa khathesi sengibonile ukuthi ukuthunga lokhu kuqakathekile kakhulu ngoba sengize ngathola ikhuba lokulima ngokuba yintshantshu ekuthungeni i-Office Tray. Ngizwa ngithaba kakhulu ngoba izandla zami sezize zangitholisa ikhuba njalo ngangingelalo ngilima nzima kodwa khathesi angisoze ngihlupheke ngizazilimela kuhle.
“Ngalokhu ngiyayibonga inhlanganiso yeLupane Women’s Centre ngoba sisithuthukisile nanko phela sesisazi ukuziphilisa ngokuthunga,” kutsho uNkszn Ncube.
Ekhuluma lentatheli uNkosazana Enesi Sibanda omunye wabathole imivuzo kulo umncintiswano uveze ukuthi amalunga ayayibonga inhlanganiso le ngoba sithuthukise indawo yeLupane Women’s Centre ngoba khathesi inengi lamalunga ayo sethuthukile.
“Inhlanganiso le iyasincedisa kakhulu sibili ngoba singathunga izitsha zethu iyasidingela abazifunayo isuke lapho isiphe imali yonke ezithengwe ngayo. Lokhu kuyajabulisa kakhulu sibili ngoba thina sisodwa ngeke senelise ukuzithengisela izitsha lezi njengale inhlanganiso,” kutsho uNkszn Sibanda.
Umqondisi wale inhlanganiso uNkosikazi Hildegard Mufukare ubikele intatheli ukuthi inhlanganiso le ijonge ukuthuthukisa abesifazane kakhulu.
“Injongo yethu kule inhlanganiso yikuthuthukisa abesifazana njengoba bencindezelwe besenzelwa ngabesilisa.
Ngenxa yokuthi abesifazana babencindezelwe ngakho njengenhlanganiso sananzelela ukuthi kufanele siveze ukuthi labo bayenelisa ukusebenza njengabesilisa yikho nje saqala ukubakhuthaza ukuthi bathunge babuye balime lezilimo ezehlukeneyo.
“Omama laba bathunga izitsha, amasofa, amafasitela, imibheda, kanye lezinye impahla zakhathesi noma nje ziyabe zenziwe ngelala lesikusha. Impahla lezi sandise ukuzithengisela amahoteleni kanye lokuzithengisela amakhiwa besesisipha abanikazi bazo imali.
“Isifiso sethu yikuthi ezinye inhlanganiso zisincedise ngemali ukuze senelise ukuthuthukisa omama kule indawo sibuye sincedise kokunye esikuswelayo,” kutsho uNkskz Mufukare.
