uMthunywa
Nkosilathi Sibanda
UMBUKISO wezamabhizimusi oweZimbabwe International Trade Fair (ZITF) walonyaka uzavulwa ngokusemthethweni yiNkosi uMwati III oweSwatini ngoLwesihlanu.
Lo kuzabe kungumbukiso wehlandla lesi-63. Inkundla yokuxhumana kwamabhizimusi le ihlanganise amankampani avela emazweni abalisa iBotswana, Malawi, Mozambique, South Africa, Zambia, Angola, Kenya, Nigeria, Tanzania, Belarus, France, Germany, Iran, Italy; Japan, the Netherlands, Sweden, United Arab Emirates, United Kingdom, China leMelika.
UMgcinisihlalo weZITF uBusisa Moyo wazise ukuba lonyaka kulamankampani eyedlula ikhulu atshengisa impahla zawo okwakuqala kulumbukiso. Uveze njalo ukuthi umbukiso uzavulwa yiNkosi yeSwatini.
“Umbukiso uvulwa ngoLwesihlanu lapho esizakuba leNgwenyama yeSwatini iNkosi uMswati III.” Uthe indikimba yombukiso igxile ekwakheni lokudinga amaqhinga amatsha okuvuselela umkhonomi.
“Umbukiso walonyaka umkhulu. Sitsho njalo ngoba kulamankampani amanengi abukisayo ukwedlula ngomnyaka odluleyo,” kutsho uMnu Moyo ngoLwesibili emini. Uthe phakathi kombukiso, okuza hamba phambili ngumhlangano wamabhizimusi ozaqhutshwa ngoLwesithathu.
Umhlangano lo kubikwa uzavulwa nguMsekeli kaMongameli welizwe uConstantino Chiwenga.
“Lonyaka kulembukiso lokuphatheka kwaphezulu kwamanyuvesi lezinye ingatsha zemfundo ezihlose ukubambelela kwezokuthuthukisa umkhonomi wakuleli.” Kusenjalo, uMnu Moyo uchaze ukuba sebeyehlise intengo yokungena eZITF.
“Silale izikhalazo zikazulu, sehlisa intengo yokungena. Abadala bazabhadala iUS$5 abantwana US$3. “Sinxusa bonke abantu bakoBulawayo ukuthi baze ngobunengi babo ngoba sibaphathele konke okumnandi, okuzaba thokozisa,” kutsho uMoyo.
Njengenjwayelo, iZITF ibike ukuba umphakathi uzavulelwa amagedi ngoLwesihlanu langoMgqibelo.