uMthunywa
Nkosilathi Sibanda
NGELINYE ilanga kuzakuba leqembu lenguqu lelokitshini lePumula koBulawayo elizadlala enkundleni zePremier Soccer League, ngokutsho komqeqetshi wodumo uSakheleni Nxumalo.
Umqeqetshi lo, ukhuluma kanje ezitshaya isifuba ngoba esazi ukuthi iqembu lakhe le-East Rovers lihlose ukuthi kuminyaka emithathu ezayo, libe selindiza lezinye ezinkulu.
Iqembu leli selikhangelele ukugiqa unobhutshuzwayo kuZifa Southern Region Division 2 ngesizini ezayo.
I-East Rovers ngelinye elibalelwa kulezo ezindala edolobheni lakoBulawayo. Kuqala ngeHighlanders, kuze iZimbabwe Saints, kube sekubuya yona i-East Rovers.
Kodwa ubudala balo bebungasaziwa nanko beseliphethe lidlalela ezikwakweni, lisehluleka ukuthi litshengisele ukuthi lasungulwa kudala, ezincane zingakabi khona.
Banengi njalo babalwa bengaqedwa abadlali abasuka ku-East Rovers bazakhela udumo kwamanye amaqembu.
Imbali yenguqu koBulawayo ayeneli nxa kungakhulunywa nge-East Rovers, ngokutsho kwezazi zomdlalo.
Umphakathi welokitshi lePumula East uyazigqaja ngalithimu, okokuthi lapho edlala khona kuhlala kugcwele. Lamanye amaqembu akuPSL ayehluleka ukubiza ababukeli abalandela i-East Rovers maviki wonke.
Sakheleni Nxumalo lo Kirsty Coventry
Umqeqetshi uNxumalo, odume ngelithi “Dj Khesa” kumsakazo weKhulumani FM, ubikele uMthunywa ukuthi usekelo abaluthole kuzakhamizi zePumula East lokusebenza nzima, yikho okubafikise phezulu.
Uthe ukuphumelela kwabo kwaba yikuhlanganisa amakhanda okwenziwa zinkokheli zeqembu, abadlali, abasekeli lezakhamizi.
“Umphakathi welokitshi le-Pumula East uhlale phansi, wadla amathambo engqondo kwavunyelwana ukuthi sekuyisikhathi sokuthi iqembu lidlale enkundleni eziphezulu kuhloswe ukuyafinyelela inkundla zePSL,” kutsho uNxumalo, ophinda asebenze eyintatheli futhi.
Utshele intatheli yephephandaba likazulu ukuthi eqala ukuphatha intambo ku-East Rovers, wazimisela ukuthi avuse iqembu, likhuphuke liye ku-Division One, kuhlehlwa indlela yokuya kumaligi aphezulu.
“Ngiqale ukusebenza leqembu ekuqaleni komnyaka ngemva kokukhulumisana lomgcinisihlalo walo uMadza Takawira. Sabonisana ukuthi icebo lokuphumelela kweqembu yikusebenza sibambene. Ngisebenze ngincedisana loKhulekani Moyo loButholethu Ngwenya ekuqeqetsheni iqembu.”
UNxumalo ubalelwa kubaqeqetshi bakoBulawayo asebefunde inguqu benelisa ukubamba izithupha zomsebenzi ngaphansi kwenhlanganiso ye-Fifa.
Imbali yakhe ekuqeqetsheni ibatshazwa linengi labadlali abasakhulayo abasuka ezikolo bakhethwa kumaqembu amakhulu.
Uthe ukuphumelela kwabo kuvele ngokuhlanganisa iqembu elilabadlali asebekhulile lalabo abasadinga imfundiso loba belethalenta.
“Kulumkhankaso besilabadlali abalesikhathi eside bekunguqu. Abanye ngabafana engike ngasebenza labo ngisaqeqetsha iqembu leToronto sisuka ku-Division 3 saze safika kuDivision 1.
“Lapha ngibalisa abadlali uPhindani Ngwenya loNtandoyenkosi Dube labanye, okuyibo abahlanganise umqondo wami eqenjini, senelisa ukukhuphukisa iqembu.”
Umncintiswano wenguqu ka-Division 3 kubikwa unzima ngoba wonke amaqembu alabadlali abalesiphiwo. UNxumalo uthe ngenxa yalokho, bekungekho lula enkundleni.
“Bekungekho lula ngoba leli liqembu elilabadlali asebekhulile, abalemuli ezidinga ukunakekelwa. Uyathi udinga umdlali ekutshele ukuthi kasoke abekhona mhla welanga ngoba kukhona amele akwenze. Injalo inguqu yethu kumaligi aphansi.
Uyathola ukuthi lanxa sidlala ngeSonto, iqembu alidlali kakuhle ngoba abanye abadlali bayabe benambithe umagwebu ngayizolo, bengasahloniphi ibhola beqakathekisa ubunandi. Kodwa ngemva kokuxoxisana lamadoda, savumelana ukuthi okuqakathekileyo yikukhuphula iqembu, silisuse lapho elikhona lingene kumaligi aphezulu.
“Umncintiswano kuDivision 3 ubungekho lula ngoba amaqembu amanengi aqinile, ikakhulu nxa sikhangela iBulawayo Chiefs eyiyo ebeyintshantshu. Sikhangele njalo leqembu leNust, eliqeqetshwa ngumqeqetshi kuzwa uJoseph Sibindi. Ngamanye amaqembu akade esinikeza umncintiswano enkundleni,” kutsho uNxumalo.
Umqeqetshi lo uthe ababuyeli emuva ngoba indlela yokufika kuPSL isivulekile.
“Ngithanda ukuncoma izinga lomdlalo wamaqembu akuDivision 3. Ligcwele ithalenta elidinga usekelo. Thina ukunqoba kwethu kube yinhlanhla ngoba kweminye imidlalo besiphuma ngesikhala senalithi.
