uMthunywa
MTHWAKAZI kaNdaba babengasomi oMandulo ukuthi inkabi edonsa emfolweni kayikhohlwa njalo igula elidala livame ukunuka amasi. Lokhu kubonakala ngephephandaba likazulu elidume ngendaba ezimnandi njalo elingadeliyo ukujabulisa uzulu nanko phela kule iviki lize lenye yengqungquthela yezomculo we-rhumba engena kuhlabeke umphakathi.
Kambe lingaba yiliphi leliqembu ngaphandle kweNkayi Messengers Band eliholwa nguNgqabutho Voko ijaha eliphuma kweleNkayi. Kayitshayi nje isiginci indoda le iyaphoxa bakwethu. Qhubeka ufunda uzwe ingxoxo enambithekayo phakathi komculi lo wodumo, uNgqabutho Voko (NV) lentatheli yephephandaba likazulu uCornelius Luphahla (CL).
CL: Umphakathi uthanda ukwazi mayelana lembali yakho kanye leyeqembu lakho.
NV: Mina ngazalelwa esigabeni seMbuma eNkayi okuyikho engakhulela khona. Izifundo zami ngaziqalela eMphakama Primary School ngaqhubekela phambili ngezifundo zami ngayafunda uFomu 1 eZwelabo Secondary School okuyikho engaqhuba khona izifundo zami ngaze ngayafika kuFomu 4.
Ezokucula ngaziqala ngo1999 ngesikhathi ngisaculela kwelakithi eNkayi. Kwathi ngo2001 ngasuka kwelakithi ngayaculela kweleSouth Africa okuyikho engikhona lamanje lomngane wami uIshmael Ncube labanye esisebenza sonke eqenjini.
CL: Lokhe waqalisa ukucula sowakhipha amadlalade amangaki mfo kaVoko.
NV: Lokhe ngaqala ezokucula sengakhipha amadlalade angu-9, elakuqala ngelika1999 elithi, Umabonabulawe kuthi elokucina ngelika 2015 elithi, Inhliziyo.
CL: Uzulu uthanda ukwazi ukuthi wandise ukudlalela ngaphi ingoma zakho?
NV: Sandise ukutshaya kuma-shows ekhaya eNkayi ikakhulu nxa kulikhefu. Lapha ngacina kudala ukudlala ingoma zami ngoba kulabanye abaculi ababebuya nxa sile-show bafike bacitshe imitshina yethu baqalise udlame ngoba belomhawu wokuthi kungani sicula. Yikho okwenza ngabona kungcono ukwenza imicimbi ekhaya ngoba kulokuthula.
CL: Abantu bathini jahalakithi ngomculo wakho njalo ukhangelele ukubenzelani lonyaka?
NV: Abantu bayawujabulela kakhulu umculo wami njalo bangikhuthaza ukuthi ngiqhubekele phambili ngibajabulisa ngingadeli noma kunzima. Lonyaka ngithembisa uzulu ukumhwatshela iDVD yedlalade lami lika2015 elithi Inhliziyo.
Ngenza lokhu ngoba abantu balincome kakhulu yikho ngibone kungcono ukuthi ngibaphekele ividiyo yalo bazibonele ukudla kwamehlo.
CL: Bunzima bani oyake uhlangane labo kwezomculo njalo nkuthazo bani oyipha abaculi abasasungula.
NV: Ndoda indima yezomculo inzima kulezinsuku, ukutshontshwa komculo abantu bathengise ngemali engatsho lutho yikho okusithwalise nzima kakhulu. Abantu bangavele bathenge ingoma zakho ngemali encane nxa usuthengisa wena mnikazi abantu bayabe bevele sebelawo kungakho kabasathengi amadlalade okuyangaphi.
Okunye njalo yikuthi abanye abaculi basuka bathumele abantu ukuthi bakhulume kubi ngomculo wami noma nje abalandeli bami bona bewuthakazelela.
Ngalokhu kubaculi abasasungula ngithi kababambelele ngamandla ngoba kunzima kwezomculo. Okunye njalo ngithi kabajonge ukujabulisa uzulu kuphela njalo kabasebenzise iziphiwo zabo.
