uMthunywa
NguEmmanuel Ndlovu
UKUKHONONA kwabaculi bakoBulawayo ngenxa yokuswelakala komsakazo othuthukisa imsebenzi yabo besokuyinhlalayenza nankuo phela bebeveza ukuthi imsakazo le ekhona njalo isakaza isesigodlweni seHarare iyabancindezela.Ngalokhu ukunikezwa komsakazo weSkyz FM ichence lokusakaza ngokusemthethweni ukoNtuthu sokunikeze abahlabeleli amadlabuzane kanye lethemba lokuthi lumsakazo uzancedisa ukuthuthukisa imsebenzi yabo.
UTrust Gumpo ongumqondisi weqembu leKwabatsha Dance Company elake laduma ngengoma ethi Bhatshi, uthe lumsakazo uzenza imsebenzi yabaculi abanengi koBulawayo yazakale lula emphakathini.
“Ngilethemba lokuthi lumsakazo uzaletha inguquko enkulu koBulawayo ngoba besokuyisikhathi eside silokhe sikhala njengabahlabeleli sifuna ukuthi lathi sibelomsakazo duzane lathi.
“Lumsakazo uzavuselela ezemidlalo lapha edolobheni kukanti uzasinikeza intshukuntshu njengabahlabeleli eyokuthi sisebenze gadalala,” kutsho uGumbo
UKhulekani Bethule uthe ukuze lumsakazo uthuthukise imsebenzi yabadlali kudingakala ukuthi kuqale kuvuselelwe ulukuluku lokuthanda ukulalela umsakazo emphakathini ngoba lokhu kubikwa akusekho ebantwini.
“Abantu kulezi insuku abasathandi ukulalela i-radio njalo le ngenye inkinga okumelwe iqedwe emphakathini.
“Kukanti ngaphezu kwalokhu kuyadingakala ukuthi labasakazi babelendlela ezakhanga abalaleli ukuze kususwe ingqondo yokuthanda ukuhalela imicimbi yeGoli ebantwini bakoBulawayo,” kutsho uBethule.
Iloba kunjalo, uNdux Junior uthe akusiqiniso ukuthi abantu bathanda kakhulu imicimbi yeGoli ukwedlula eyelizweni lakubo.
Uthe: Akusikho ukuthi abantu bathanda into zeGoli kodwa yikuthi akulamsakazo kwelakithi obathokozisa ngendlela ebasuthisayo njengeyeSouth Africa.
Lokhu kubuye kwagcizelelwa nguDerrick Majaivana yena othe kudingakala ukuthi kubelobudlelwano obukhulu phakathi kwabaqondisi bomsakazo lo, lezakhamizi zakoBulawayo kanye labadlali abatshiyeneyo ukuze uthuthuke.