uMthunywa
Cornelius Luphahla
INDUNA yeMangwe ilwisana lempi yenkathabetshabi esigabeni sayo nanko phela izakhamizi zakule indawo kukhanya zibhalisana ngokukhethana ekuholeni ukudla okuvela kunhlanganiso ezizimele zodwa.
Indaba le kukhanya yaqala ngethuba izakhamizi lezi ziqala ukuholiswa ukudla yinhlanganiso ye Organisation of Rural Associations for Progress (iOrap) lapho ezabhalisana ngokwazana zatshiya ezinye izakhamizi eziswelayo zingabhalwanga okuyikho okudala ukuthi lakhathesi zingaholiswa ukudla lokhu.
UMthunywa ukhulumisane lesakhamuzi sakule indawo uNkosazana Hleziphi Tshuma ochaze ukuthi sebefile ngendlala ngenxa yenkethabetshabi elapha.
“Sesifile ngendlala ngenxa yezakhamizi zalapha ezikhethana zodwa zihole zodwa ukudla. Into engidanisayo yikuthi inhlanganiso le yafika yathi izakhamizi zikhethe abantu abaswelayo kanye lasebekhulile abangasenelisi ukuzisebenzela kodwa khathesi kuhola abantu abalezitolo labalezimota kuthi labo abangela lutho bengatholi lutho.
“Ngikhuluma nje sesilamalanga amathathu labantwabami singasazi isitshwala siphila ngamajodo lemibhida.
Khonapho izakhamizi lezi zingahola ukudla lokhu ziyakuthengisa ngemali ephezulu asazi ukuthi zisibangisani,” kutsho uNkszn Tshuma.
Induna yakule indawo uMnumzana Samson Ncube uchaze ukuthi lokhu ezama amacebo okulungisisa indaba yenkethabetshabi esesigabeni sakhe ngoba abantu bakhe babulawa yindlala.
“Indawo yami le ilabantu abalolunya sibili ngoba kabazwelani baholisa abantu abangahluphekiyo betshiya abahluphekayo. Isimanga yikuthi inkokheli zeOrap le ngazibikela ukuthi kungcono ukuthi osobhuku bazikhethele abantu abahluphekayo okufanele baholiswe kodwa kazizange zakulalela lokhu zathi izakhamizi zikhethane yikho nje sokulobugwelegwele ekuhloleni.
“Khathesi engizakwenza ngizakhulumisana lazo inkokheli lezi mathupha ngithi kakukhethwe kutsha abantu abazahola ukudla lokhu ngoba abantu bayafa ngendlala. Nxa kusehlula lokhu kungcono ukuthi inhlanganiso le yekele ukuholisa endaweni yami ngoba ngeke kuvume ukuthi abantu abaswelayo bengaholiswa kuholiswe abazihlalele kuhle,” kuphetha induna uNcube.
Imizamo yokukhulumisana labeOrap yehlule.
