uMthunywa
Ethel Ncube
KULENINA leLupane elithole indondo kumculo weGospel elizweni leSouth Africa lapho obekuphiwa khona abaculi abatshiyeneyo indondo zokuhlabela.
USikhanyisile Ncube oleminyaka engu-33 uhlabela ingoma zeGospel njalo waqala ukuhlabela ngomnyaka ka-2022. Lonyaka usethole izicoco ezimbili.
UMthunywa uxhumane loSikhanyisile Ncube obike ukuba kuyamjabulisa lokho.
“Mina ngaqalisa ukuhlabela ingoma zeGospel njalo lokho ngaqalayo sengakhupha ingoma ezimbili kungama single track. Indlela Zakho eyaphuma ngoNkwenkwezi ngomnyaka ka2022 kwalandela ethi Khuleka Lonyaka.
“Lonyaka ngangena kumncintiswano wokuhlabela ePlumtree ngathola izicoco kuPlumtree Talent Show. Ukuthola kwami isicoco lapha kwangijabulisa kakhulu kwenza ngifise ukuqhubeka ngihlabela. Kuyonale inyanga ngithole njalo isicoco eMzansi Africa ngaphansi komsakazo othi Amaqhawenentaba. Ingoma eyangitholisa isicoco ngethi Indlela zakho,” kubika uSikhanyisile.
Uqhubekele phambili waveza ukuba abahlabeleli kumele babambelele emculweni.
“Ngilenkuthazo kubahlabeleli abangakaze bathole izicoco ukuba bengadeli ukuhlabela kodwa baqhubeke besebenza nzima. Kukho konke ngithi inhlonipho lokuzehlisa yikho okuqakathekileyo ngesikhathi sicela amavoti ukuze sithole izicoco.
“Okokucina ngibonga abalandeli bami labo bonke abavotela ingoma yami ngithi lizizwe libongekile lapho elikhona,” kuphetha uSikhanyisile.