uMthunywa
YiNthatheli kaMthunywa
KULENDODA yelokitshini leMpopoma koBulawayo etshiye umthethwandaba weWestern Commonage ubulawa zinsini kulandela ukubanjwa ilunguze umkamakhelwane wayo egeza.
UNixon Mpofu umiswe phambi komthethwandaba kuviki ephelileyo njalo uvume elandula lelicala phambili kukamantshi uTemba Chimiso.
Umsolwa lo ucatshe ngomunwe ethi ubengalunguzi kodwa ubechitha eceleni kwesambuzi.
Inkundla izwe ukuba lokhu kwenzakale mhlaka 16 Mbimbitho ngesikhathi zantambama lapho uMpofu abanjwa ngumakhelwane ethe nhlo amehlo ezikhaleni zomnyango wesambuzi.
Kuzwakale emthethwandaba waseWest Commonage kuliviki ukuthi uMpofu wabanjwa ngumkakhe wenina leli uBen Chirwa (36) esenza lelihlazo. UMpofu loChirwa inkundla izwe ukuthi babenatha bonke utshwala ngalelolanga njalo ngabangane.
Ngokubika kukamtshutshisi wecala uNkosikazi Fiona Ncube, umsolwa uMpofu wabanjwa elunguza inkosikazi kaChirwa mhlaka 16 kulinyanga.
Umtshutshisi ubikele inkundla ukuba uMpofu loChirwa ngabangane ababenatha bonke utshwala endlini kaChirwa.
Inkundla itshelwe ukuba uMpofu wathuma uChirwa ukuthi ayethenga utshwala emavinkilini aseduzane ikanti ulenjongo yokuthi enze ihlazo kumkamngane wakhe.
Ngesikhathi leso kubikwa uMpofu wasala ekhombisa uNkosikazi kaChirwa kodwa kwehlula ukuthi athole impendulo.
Inkundla ilandiselwe ukuthi umsolwa waqalisa ukukhombisa inkosikazi kamakhelwane wakhe yona okubikwa yakutshaya indiva lokhu yathatha amanzi yayageza esambuzi.
UMpofu wabona kungcono ukuthi azithokozise ngokulunguza inkosikazi kaChirwa igeza. Kubikwa ngesikhathi uMpofu ezithokozisa, uChirwa wathutsha wambamba xhaka ethe lungu esikhaleni somnyango.
Inkundla izwe ukuba uChirwa wabuzisisa ukuthi umsolwa wenzani kodwa akulampendulo ecacayo ayitholayo.
Kubikwa uMpofu wasuka lapho wadobha iketane yebhayisikili watshaya uChirwa esithi uyamdelela ngokumbuza akwenzayo.
Umtshutshisi uthe uChirwa wafikisa udaba emapholiseni okwenza umsolwa abotshwe ngokuphangisa.
Ebuzwa ngecala lakhe uChirwa uvumile wathi watshaya umngane wakhe ngoba ezwe ubuhlungu ngokuqanjelwa amanga.
Ngemva kokuzwa ubufakazi lobu umantshi uMnu Temba Chimiso unqume ukuthi umsolwa ajeziswe ngokusebenzela umphakathi engatholi lutho okwamahola angu-105.
