uMthunywa
YiNtatheli kaMthunywa
IMADOLONZIMA imuli yakoJubane esigabeni seSt Lukes eLupane ngemva kokuzibophela kwendodana yayo kulandela ukuxabana laboyisekazi bethi yehlukane lesalukazi esithetheyo ithathe umfazi abayipha yona.
Umuyi uMduduzi Jubane utholakale ezibophele ethungweni lwendlu yakhe ngoMvulo ekuseni kuviki ephelileyo ngemva kokuxabana loyisekazi uMbundana Jubane lodadewabo uBusi bebanga ukuba kungani ethethe umfazi abangamfuniyo.
Kubikwa kuthe sokungcwatshwa umuyi yaqala njalo impi phakathi kwezinye izihlobo zakhe kuthiwa oyisekazi labo yibo abambuleleyo.
Iphephandaba likazulu lixhumane loMnumzana Silas Ndlovu ongumakhelwane wakoJubane waveza ukuthi kubeluthuli emfeni yakoJubane.
“Sibambe oluphuphumayo emfeni yakoJubane uyisemncane kanye labanewabo bakamuyi befuna ukuqeda oyisekazi bethi yibo abambuleleyo.
“UMbekezeli umnewabo kamuyi wayesethwele umkhonto efuna ukubadla engabasuthi oyisekazi baze bayacatsha endlini.
“Sithe sibuza ukuthi kungani bethi yibo abambuleleyo bathi kungenxa yokuthi bamthethisa mhla ezavuka ezibophele baphinda baxotsha umkakhe bethi kabamfuni.
Kusenjalo bathi nxa efuna ukuphila katshiye umfazi lo amthetheyo ngoba yisalukazi njalo mubi kafanelanga ukwendela kumuli yakoJubane,” kutsho uMnu Ndlovu.
Ekhuluma loMthunywa uNkosazana Siphiwe Dladla oyisakhamuzi sakule indawo uveze ukuthi ingxabano le silesikhathi eside yaqala lapha koJubane.
“Imuli le ibisilesikhathi eside yaqala ukungezwani ngoba uNkszn Jubane wabuya lomfazi eJabatshaba lapho endele khona ethi uzomnika uMduduzi.
Noma nje wamthatha kodwa kazange wahlala laye isikhathi bahle behlukana.
Ngemva kokwehlukana kwabo kwahle kwaqala ukungezwani phakathi kwakhe laboyisekazi.
“Ngemva kwalokho uMduduzi wathatha omunye umfazi wakoNcube onguye abamxotshileyo bethi kabamfuni ekhaya ngoba yisalukazi waze wayalala komakhelwane.
Into engimangalisayo yikuthi uMaNcube utshiye ebhalele umkakhe ukuthi yena sehamba kodwa umkakhe angahlali ekhaya ngoba bazasala bembulala. Kuthe ekuseni sezwa kuthiwa uMduduzi sezibophele,” kulandisa uNkszn Dladla.
UMnumzana Dumisane Jubane oyisihlobo sikamuyi ubikele intatheli ukuthi uzwa ubuhlungu ngale indaba ngoba umntwana womfowabo uzibulele ngenxa yaboyisekazi.
“Ngizwa ubuhlungu kakhulu ngoba umntanomfowethu uzibulele nje ngenxa yabodadewethu. Okusuka kungidanise yikuthi kambe umuntu uyakhethelwa yini umfazi afuna ukumthatha?
Okunye njalo oyisekazi laba bebengafuni ukuthi akhe umuzi wakhe bethi kumele baqale bamtshayele ihlahla, asazi ukuthi bebefuna ukuwufakani umuzi wakhe ngokumtshayela ihlahla,” kutsho uMnu Jubane.
Ebuzwa ngale indaba uNkszn Mbundana Jubane uchaze ukuthi yena kazange waxabana lomuyi kodwa ubemkhuza bebonisana ngempilo.
“Mina kangizange ngaxabana laye umuyi kodwa besimbonisa ngilodadewethu simkhuthaza ukuthi angaze waxabana lomama nxa ethutha, kaphume ngokuthula.
Noma kunjalo kazange wasivezela ukuthi uzondile ngoba sicine sikhulumisana kuhle.
“Umkakhe laye kasizange samxotsha kasazi ukuthi okwenze wayalala komakhelwane kuyini. Ngikhuluma nje lokuthi uMduduzi sebhubhile sizwe ngaye ekuseni ngesikhathi ezolanda impahla zakhe kuye.
Yikuthi nxa umuntu sebhubhile kuvame ukuba lomsindo kuphela,” kuphetha uNkszn Jubane.
