uMthunywa
Cornelius Luphahla
ZISABAMBE eyangaphansi izakhamizi zesigabeni seMabobolo eBinga ngemva kokuba enye indoda ethethe isithembo ithathele umntanayo unkosikazi yathi imkhange ngentebe yayo, uMthunywa uyakuveza lokhu lamhlanje.
UMnumzana Folosi Mwinde kubikwa usebenzise intebe yakhe yokuthanda abafazi ukuphendula inhliziyo kamalukazana wakhe, uNkosazana Cathrine Donga ukuthi amthande ngesikhathi umkakhe esemsebenzini koBulawayo.
UMnu Folosi uselamakhosikazi amathathu.
UMthunywa uxhumane loMnumzana Jacob Chili oyisakhamuzi sakule indawo wathi ngemva kokunanzelela indaba le bazama ukukhuza uFolosi wabathembisa ukubagamula okuyikho okwenza bayabikela induna.
“Mina ngathi ngisemzini wami kwabuya umkaMwinde uLinda Ndlovu wangibikela ukuthi umkakhe usethethe umalukazana wakhe ngasengibiza ezinye izakhamizi ukuthi siyemkhuza. Sathi sifika emzini wakhe simbuza wathatha ihloka ethi ufuna ukusigamula sabaleka.
“Ngemva kwalokho sasuka sayabikela induna uDobola ngoba indaba le yayisethusa esigabeni. Ngalesosikhathi induna yathumela amapholisa ayo ukuthi ayebuya laye azothonisiswa kodwa kwehlula ukuthi athonisiswe ngoba umntanakhe wayengekho esemsebenzini ngakho akuvumi ukuthi umkakhe ahlaliswe edale yena engekho,” kutsho uMnu Chili.
UMnumzana Jele Nkala uthe uMnu Mwinde wabikela induna ukuthi umalukazana umthole ngokusebenzisa intebe emenza athandwe ngabesifazana.
“Mina okungimangalisileyo yikuthi induna ithe imbuza uMwinde ukuthi wakwenza njani ukuthandana lomalukazana wakhe wathi ulentebe eyenza ukuthi athandwe ngabesifazana ngakho yiyo ayisebenzisayo ukuze athandane lomalukazana wakhe,” kutsho uMnu Nkala.
UmkaMnu Mwinde, uNkszn Ndlovu ubikele intatheli ukuthi uzwa ubuhlungu kakhulu ngesiga esenziwe ngumkakhe esokuthatha umalukazana wakhe njalo yena kasamfuni.
“Mina ngizwa ubuhlungu kakhulu ngesenzo esenziwe ngumkami esokuthathela umntanami umkakhe. Lokhu kuyayangisa kakhulu ngoba kufana lokuthi ulele lomntanakhe ngakho kusiya ngami ngabe uyabotshwa njalo lami nginje sengisukile emzini wakhe ngoba usethethe umtanami,” kutsho uNkszn Ndlovu.
Imizamo yokukhulumisana loMnu Mwinde yehlule ngoba kalacingo angaxhunywa kulo.
UMnumzana Dobola, induna yakule indawo, ebuzwa ngale indaba uvumile ukuthi uyayazi wathi kalankani ngayo ngoba iyamethusa kakhulu kakaze ayizwe empilweni yakhe njalo ubona kungcono ukuthi ayise emapholiseni.
“Lokhe ngathwetshulwa yingwe ngakhotha udengezi lwedubha kangikaze ngizwe kuthiwa kulendoda ethatha umalukazana wayo ngakho indaba le ingethusile kakhulu. Ngikhuluma nje ngimbuzile uMwinde wavuma ukuthi uyakwenza lokhu kodwa ngisalindele ukuthi umntanakhe abuye ukuze siyikhulume.
“Okungethusayo yikuthi ubesefuna ukugamula abantu esola ukuthi kungani bemkhuza. Ngalokhu ngibona kungcono ukuthi indaba le ngiyidlulisele emapholiseni,” kuphetha uMnu Dobola.
