uMthunywa
Thokozile Mbedzi
ZILOKHU zinkemile izakhamizi zesigabeni seSiyoka eBeitbridge ngemva kokuba enye indoda ilume umzawayo qede yamdlwengule, uMthunywa ukuzwile lokhu.
UDivine Sibanda oleminyaka engu-30 kubikwa ulume waphinda wadlwengula umzawakhe oleminyaka engu-35 mhlaka 14 ebusuku.
UMthunywa uzwe ukuthi uSibanda wanyenyela umzawakhe lo ebusuku elele wafika wamluma esiphundu efuna angamlwisi.
Ekhuluma lentatheli udadewabo kamamangala, uProgress uthe lokhe bedidekile njengomdeni ukuthi uDivine ubengenwe yini aze enze uchuku olunje kumzawakhe.
“Silapha sizibuza imibuzo engadingi impendulo ukuthi kambe uDivine ubengenwe yini aze adlwengule umzawakhe ngemva kokumluma amtshiye elamanxeba amabili esabekayo.
“Ngidabukile ngokwenziwe nguDivine, mina lomamangala omama bethu bangamaphahla kodwa sebedlula emhlabeni kukanti uDivine ngumntakamalume.
“Kukhanya ubemkhulela uDivine yikho nje eze wabumba icebo lokuthi amlume ukuze amhlukuluze,” kuchasisa uProgress.
Kubikwa udaba lolu selubikiwe emapholiseni.
Umamangala useke wathathwa ngamapholisa ukuze asiwe esibhedlela ukuyahlolwa kanye lokwelatshwa amanxeba.
“Amapholisa amthatha wayahlolwa lokwelatshwa. Asazi sibili ukuthi uDivine ubengenwe ngumoya bani ukuze ahahabele umuntu omdala kulaye njalo ongaphathekanga kuhle engqondweni. Kuyasethula mpela lokhu,” kuchaza uProgress.
UMlisa uLiberty Mleya ebuzwa ngodaba lolu uvumile wathi lwenzakele njalo uthe lesi yisenzo esibi emphakathi esingafunakaliyo esiphinda sibe lihlazo.
“Amasiko ethu kawakuvumi lokhu ngilethemba ukuthi umthetho uzadlala indima yawo ngoba umamangala ngumuntu okumele avikelwe nguye wonke umuntu ikakhulu abemuli kungakho lo oyenze lokhu uphambanise kakhulu,” kuphetha induna uMleya.
