uMthunywa
Cornelius Luphahla
ZIBUKELE ibhayisikopo yamahala izakhamizi zelokitshini leCowdray Park koHawkflight lapho elinye inina elibhuqe khona umkalo ngogodo kabuhlungu laze lamephula ingalo kubangwa ukuba udliwe emakhasini.
Impi le yenzakale ngeSonto kuyonale iviki lapho uMnumzana Langton Moyo abhuqwe khona ngumkakhe uNkosazana Agnes Nkomo wamephula ingalo ethi uqedele umholo wonke emakhasini.
Kuzwakale ukuthi uMnu Moyo wasuka endlini esithi uya komakhelwane yena esiya emavinkilini lapho afika watshova khona amakhasi.
UMthunywa ukhulumisane lesakhamuzi sakule indawo uNkosazana Loveness Dube waveza ukuthi wezwa sokungumsindo komakhelwane wafika wancedisa ukulamula.
“Mina ngezwa sokungumsindo komakhelwane ngagijima ngathola uMoyo sewele phansi umkakhe embhula ngogodo. Kwaba yinhlanhla ngoba ngafikisana labanye omakhelwane sahle sancedisana ukulamula kwaba yikusila kwakhe uMoyo.
“Noma nje salamula kodwa uMoyo wayeseqamuke ingalo yenxele okwadala ukuthi simthwale ngemota simuse esibhedlela,” kutsho uNkszn Dube.
UMnumzana Dennis Phiri oyisakhamuzi kule indawo uveze ukuthi okwenza uMoyo wephulwa ngumkakhe yikuthi wayedakwe kakhulu engenelisi lutho.
“UMoyo ngalelolanga wayedakwe kakhulu ngoba lakoMakoni wasuswa yimi ngamusa endlini ngimthwele ngemota ngoba wayengenelisi lokuhamba. Ngafika ngamtshiya endlini yakhe elele.
“Ngokubona kwami yikho okwacaphula umkakhe ngoba lemali wayengaselayo wasemtshaya njengoba wayesezondile,” kuchaza uMnu Phiri.
Ebuzwa ngale indaba uNkszn Nkomo uvumile ukuthi yenzakala wathi wayengazimiselanga ukulimaza umkakhe.
“Kuliqiniso sibili ukuthi saxabana lomkami kodwa ngangingazimiselanga ukumlimaza ngasuka ngakhulelwa lulaka ngoba wayeseqede iholo lonke emakhasini,” kuphetha uNkszn Nkomo.
Imizamo yokukhulumisana loMnu Moyo yehlule ngoba ucingo lwakhe lwalile ukungena.
