uMthunywa
Cornelius Luphahla
INKUKHU iyawanatha amaqanda ayo, lesisaga sigcwalisekile ngesenzo senye indoda yesigabeni seDlawa eNkayi okubikwa yabulala abantwabayo abane ngoba ifuna ukunotha.
Indoda le, uSimon Tshuma kubikwa yabulala uDecent, Saziso, uBhekinkosi Tshuma kanye lomunye okungasatholakalanga igama lakhe isenzela ukuthola imali yokwenza ibhizimusi yesitolo.
UMthunywa uzwe ukuthi uTshuma wayelesithembo sabafazi abathathu ngakho ubebulala abantwana bomkakhe omncane okuyikho okudale ukuthi abakwabozala baye enyangeni yelaphe uTshuma wahle waqalisa ukugula eveza ukuthi nguye owabulala abantwabakhe unina wabantwana laba wahle wabaleka.
Intatheli ixhumane loMnumzana Joram Ndlovu ongumalume wabantwana laba ababulawa nguyise walandisa ngendaba le ethi bona belapha bengazi ukuthi abazukulu babo baqedwa nguyise.
“Thina njengomdeni sabona udadewethu esephelelwe ngabantwana sasesisiya enyangeni ukuthi isilungisele bengasafi njengoba kwasokusele oyedwa. Inyanga le yathi umuntu odala lokhu yisihlobo ngakho sabona ukuthi kungcono aziveze kulokuthi aqede abazukulu bethu.
“Ngalesosikhathi inyanga yalungisa kwathi kusiyaphela iviki uTshuma wagula waqalisa ukutshela abantu ukuthi nguye owabulala abantwabakhe efuna ukwenza ibhizimusi yesitolo. Ngikhuluma nje lakhathesi lokhu etshela abantu ukuthi nguye owazidlela abantwabakhe. Isimanga njalo yikuthi kusukela lapho isitolo sesavalwa njalo lodadewethu asikwazi ukuthi ungaphi ngoba wahle wabaleka,” kutsho uMnu Ndlovu.
UNkosazana Mongiwa Tshuma ongudadewabo kaMnu Tshuma uthe indaba le iyamethusa kakhulu njalo baswele ukuthi bayilungisise njani njengomdeni.
“Thina njengomdeni sididekile ngendaba le ngoba kasikaze sikubone lokhu njalo emdenini wakwethu akulamuntu esiyake sizwe kuthiwa ugangile. Ngalokhu sisathithibele futhi siswele ukuthi indaba le siyiqalisele ngaphi sisiya ngaphi.
“Lokhu singakathathi inyathela lokwelaphisa umnewethu njalo kasikakhulumisani labakwabozala ngoba silenhloni njalo kakho olesifiso sokukhulumisana labo,” kutsho uNkszn Tshuma.
Usobhuku wakule indawo uMnumzana Danisa Ncube ebuzwa ngale indaba uthe uyayazi kodwa iyamangalisa.
“Indaba kaTshuma othi nguye owabulala abantwabakhe ngiyayazi sibili kodwa kayikhulumeki ngoba kayikaze yenzakale esigabeni,” kuphetha uMnu Ncube.
