uMthunywa
Cornelius Luphahla
KUBE yisisanasana ubukhwa bezinja elokitshini leCowdray Park koBulawayo ngempelaviki lapho eyinye indoda ebhuqwe khona kabuhlungu yitshamali yaze yayithathela umakhalekhukhwini kubangwa imali.
Impi phakathi kukaMnumzana Clifford Nkomo lomasihlalisane wakhe uNkosazana Lunia Moyo ibangelwe yikuthi uNkomo ubengasamniki imali yokudla.
UMthunywa uzwe ukuthi uMnu Nkomo ubeselesikhathi eside ethandana loNkszn Moyo umkakhe engakwazi.
Kubikwa unkosikazi kaNkomo esezwe ngobudlelwano bomkakhe loNkszn Moyo waqala ukuthatha imali yonke umkakhe angahola. Lokhu yikho okubangele ukuthi uMaMoyo atshaye uNkomo ngoba ubengaselayo imali yokumnika njengensukwini.
Ekhuluma lentatheli uMnumzana Lyton Ndlovu uchaze ukuthi uMoyo wabhula uNkomo ngomphini wepiki samuntu obhula amabele.
“Mina bengikhona mhla uNkomo etshaywa nguMaMoyo ethi kungani engasamuphi imali. Kuthe kunjalo wamsukela ngomphini wepiki emhlane waze wawela phansi.
“Ngithe ngibona ukuthi uzamlimaza ngagijima ngalamula kwaba yikho ukusila kwakhe. Ngithe ngibuza ukuthi kungani emtshayile kulokuthi akhulumisane laye wathi selesikhathi eside ehlala embuza ngemali kodwa engacaci ukuthi uyisa ngaphi,” kutsho uMnu Ndlovu.
UNkosazana Betty Maphosa omunye umfakazi wesehlakalo lesi uthe uNkomo efika kumkakhe wathi utshaywe ngamasela amthathela umakhalekhukhwini.
“UNkomo esetshaywe ngumasihlalisane wakhe lo wafika kumkakhe wathi utshaywe ngamasela endleleni evela emsebenzini amthathela umakhalekhukhwini lemali. Kwabanzima kithi ukuthi sikhulume kumkakhe ukuba utshaywe ngumasihlalisane wakhe bebanga imali,” kuveza uNkszn Maphosa.
Ebuzwa ngale indaba uMnu Nkomo uchaze ukuthi ngeke akhulume indaba zomuzi wakhe.
“Ngeke ngilitshele ngendaba zomuzi wami ngoba ziyimfihlo yami lemuli yami. Lina lifunani kukho?” kutsho uMnu Nkomo.
