uMthunywa
Ethel Ncube
KULENDODA yeChipale eBinga ehlangane lembila zithutha ngemva kokuba ihlalwe amadundulu ngumkayo esola ukuthi kukhithike intanga zamakhomane esikhwameni sebhulugwe ngeviki ephelileyo.
UMnumzana Joel Mudimba olesithembo, ubeyikudla kwamehlo kwamanye amakhosikazi akhe ngemva kokuba unkosikazi wakhe omncane, uNkosazana Mercy Muleya embhuqe kwaba luthuli kubangwa intanga.
Ekhuluma lentatheli uNkosazana Sandile Moyo owabizwa ukuzobhula umlilo, uthe bacabangela ukuba uMnu Mudimba angabe esekhonjiwe.
“Amakhosikazi kababa lo athi indoda ivele ibathwalise nzima ngokukhombisa. Bonke nje abafazi bakhe bathi bahlala bebona izinto ezehlukeneyo ezikhwameni zamabhulugwe akhe.
“Bathi kwelinye ilanga bathola iphepha elilenombolo zocingo bazifonela kwaphendula umuntu ongumama. Sengibiziwe ngabikelwa ukuthi unkosikazi omncane utshaye umkakhe ngesicathulo emehlweni ethi wenzela ukuba angahambi esiba ngumehlomehlo emgwaqweni.
“Umkakhe wayemtshayela intanga ezaziphume esikhwameni sebhulugwe ngesikhathi ewatsha,” kubika uNkszn Moyo.
Intatheli ixhumane loNkszn Muleya ovumileyo ukuthi ngempela waxabana lomkakhe.
“Ubaba saxabana, usithwalise nzima ngokuhamba ekhombisa lathi sicina sisibakwazi hatshi lokhu ukuthi usezephiwa intanga ngabanye omama. Sibathathu khonapha kasikwanisi kodwa udinga abanye phandle,” kubika uNkszn Muleya.
Ekhuluma lephephandaba uMnu Mudimba uveze ukuba indaba le usayilungisa labomdeni.
“Ngeke ngikhulume okwemuli yami ngingakuboni, okokuxabana lomkami omncane ngahambisa ebadaleni udaba lwakhona,” kuphetha uMnu Mudimba.
