uMthunywa
Langelihle Moyo
KUDABA olutshwaqisa umzimba kulendoda yesiqintini seDakiwe eLupane engenele isalukazi (75) kunye lendodakazi yaso abangaboniyo emehlweni yadlwengula indodakazi ebusuku.
Isihluku lesi senzakale mhlaka 24 kunyanga ephelileyo.
Kuzwakale ukuba umamangala oleminyaka engu-38, ongaboniyo emehlweni, ongezwayo endlebeni futhi eyisimungulu wangenelwa endlini elele lonina nguHloniphani Ndlovu oleminyaka engu-27 wafika wamdlwengula.
Kuzwakale ukuthi umamangala wavuka esiyazikhulula phandle waphenduka wasekela isivalo ngesitulo walala kodwa umetheswacala wafika wafuqa isivalo wangena, unina kamamangala wezwa isitulo sisiwa wacabangela ukuthi yindodakazi yakhe wayisola ngokuphuma ebusuku ethi izaze ingenise ababi kanti kwasekuyisigangi lesi esasingena.
Kubikwa abafowabo bakamamangala ababili babona umsolwa engena endlini bayakhangela bamthola ephakathi kwengubo uthe ebabona weqa kwakhithika ijazi lomkhwenyana elisebenzileyo, wadobha ibhulugwe lakhe ezama ukubaleka kodwa bamvimba, bamekela ngemva kokuxolisa.
Isikhulumi samapholisa eMatabeleland North uInspector Glory Banda, uthe udaba lolu lwafika endlebeni zamapholisa, umsolwa wabotshwa.
“Umsolwa wabotshwa njalo wamiswa phambi komthethwandaba weLupane mhlaka 5 kuyonale inyanga, uzabuyela emthethwandaba mhlaka 19 kuyonale inyanga.
“Umamangala wahanjiswa esibhedlela se-St Luke’s eLupane ukuthi ayehlolwa. Amapholisa asachwayisisa ngokugcweleyo ngodaba lolu,” kuphetha uBanda.
