uMthunywa
Khanyile Ndebele
KULENINA leKwekwe eliqhuba uhlelo lokufuya ingulube eselabele abanye abafuyi ngendlela yokunakekela ingulube ezimithiyo ngenhloso yokukhulisa izibaya zabo.
UNkosazana Angeline Chimboza oleminyaka engu-24 yokuzalwa uthe okwakuqala okumele kwenziwe ngumlimi yikuthi ahlole abe leqiniso lokuba ingulube zakhe zimithi ngempela.
Lokhu ukwenza ngemva kokulungisa inhlelo zokuthi zimithe.
“Ngemva kwamalanga angu-18 kusiya kwangu-24 umlimi esenza inhlelo zokuthi zimithe kumele ahlole ukuthi sezimithi,” kutsho uNkszn Chimboza.
Uthe ingulube ezimithiyo kufanele zidle ukudla okungekho kunengi kakhulu ukuze zenelise ukwenqabela ukuthi imidlwane ikhule kakhulu icine isisedlula isibeletho sengulube ezithweleyo.
“Abasanda kuqala ukugcina ingulube, nxa ingulube izithwele kufanele ukudla kwayo kube yi-2kg.
Siyipha i-2kg ukuze senelise ukwenqabela ukuthi imidlwane ikhule kakhulu yedlule isibeletho ngoba lokhu kwenza icine iphunza,” kuchaza uNkszn Chimboza.
Uthe ngemva kwamalanga angu-80 kusiya kwangu-100 bayipha ijekiseni yamazinyane ukuze angabanjwa yimikhuhlane.
“Ngemva kwamalanga angu-80 kusiya kwangu-100 kumele ihlatshwe ijekiseni ye-E.
Coli enjenge-Litterguard ukuze kuvikelwe imidlwane ukuthi ingabanjwa ligcikwane ezenza abe lesihudo.
Uthe sokusele amalanga angu-10 ukuthi izale bayayihlola njalo bayigezise ukuze bayivikele kuzibungwana ezingayigulisa ziyiqede amandla nxa isizala.
“Ingulube zandise ukuzala ngemva kwamalanga angu-114, nxa amalanga angu-112 kusiya kwangu-118 esefikile siyayihlolisisa njalo silungiselele,” kutsho uNkszn Chimboza.
Uthe inani lemidlwane engazalwa yingulube liyatshiyana ngemihlobo yazo.
Ezimhlophe zilakho ukuzala imidlwane engu-12 kusiya ku-14 besekusithi umhlobo uMukota zizala imidlwane engu-4 kusiya ku-5.
“Okuphathisa ukuthi ingulube zizale imidlwane eminengi yikuzihlanganisa imihlobo.
“Okuqakathekileyo ngemva kokuthi sezizele yikunanzelela umdlwane kunye lomama ukuthi bahlala endaweni ehlanzekileyo,” kutsho uNkszn Chimboza.
